All posts by N Sanu

Writer, Traveler, Social worker, Psychologist, Amateur Photographer, Amateur Astronomer, Science Lover, Wikipedian. Government Employee by Profession. Lives in Thiruvananthapuram, India. From Kollam District of Kerala, now residing at Thiruvananthapuram. Working at Harbour Engineering Department. Member of Kerala Sastra sahithya Parishad, Free Software Movement of India, DAKF, Associate Editor of LUCA Science Portal

വെള്ളപ്പൊക്കത്തിൽ ശ്രദ്ധിക്കേണ്ടത്

നമ്മളിൽ പലർക്കും മുമ്പ് പരിചയമില്ലാത്ത നിലയിലുള്ള പ്രകൃതിദുരന്തമാണ് സംഭവിച്ചുകൊണ്ടിരിക്കുന്നത്. വെള്ളപ്പൊക്കം ഏതാണ്ടെല്ലായിടത്തും അനുഭവപ്പെട്ടുകൊണ്ടിരിക്കുന്നു, അഥവാ നാമെല്ലാം വെള്ളപ്പൊക്ക ഭീഷണിയിലാണ്. ഇത്തരം ഒരവസരത്തിൽ എന്തെല്ലാം കരുതലുകളാണ് നാം കൈക്കൊള്ളേണ്ടത്?

Floods
Kerala Floods (image By Ceekaypee [Public domain], from Wikimedia Commons)

വെള്ളം കയറും മുമ്പ് എന്തെല്ലാം തയ്യാറെടുപ്പുകൾ

  • നിങ്ങളുടെ പ്രദേശത്തെ നീരൊഴുക്കിന്റെ നിലയും വെള്ളപ്പൊക്ക സാദ്ധ്യതയും സംബന്ധിച്ച് പ്രാദേശിക/ജില്ലാ ഭരണകൂടം നൽകുന്ന വിവരങ്ങൾ ശ്രദ്ധിക്കുക.
  • വെള്ളപ്പൊക്ക സാധ്യത സംബന്ധിച്ച ശരിയായ വിവരം നിങ്ങൾക്ക് ലഭിച്ചാൽ, അയൽക്കാരെയും അത് ബാധിക്കാൻ കൂടുതൽ സാധ്യതയുള്ളവരെയും ഉടൻ അറിയിക്കുക.
  • അവശ്യസാധനങ്ങളുടെ ഒരു കിറ്റ് തയ്യാറാക്കി വയ്ക്കുക. അവശ്യം ഭക്ഷണ വസ്തുക്കളം കുടിവെള്ളവും കരുതി വയ്ക്കുക.
  • ബ്ലീച്ചിംഗ് പൗഡർ കരുതിവയ്ക്കുക. കുടിവെള്ളം കിട്ടാതായാൽ ലഭ്യമായ വെള്ളം ബ്ലീച്ച് ചെയ്ത് ഉപയോഗിക്കാം.
  • മണൽചാക്കുകൾ മുൻകൂറായി (സാധ്യമെങ്കിൽ മണൽ നിറച്ച്) കരുതി വയ്ക്കുക. മണൽ നിറച്ച ചാക്കുകൾ ഉപയോഗിച്ച് വെള്ളത്തിന്റെ കുത്തൊഴുക്ക് തടയാനും ഇടിഞ്ഞുവീഴാൻ സാധ്യതയുള്ള സ്ഥലങ്ങൾ സംരക്ഷിക്കാനും കഴിയും.
  • വാഹനങ്ങൾ ഉയർന്ന, സുരക്ഷിതമായ സ്ഥലത്തേക്ക് മാറ്റുക.
  • വീട് വിട്ടുപോകുന്നതിന് മുമ്പ് മെയിൻ സ്വിച്ച് ഓഫ് ചെയ്ത് വൈദ്യുതി ബന്ധം വിശ്ചേദിക്കുക.
  • മണൽ ചാക്കുകൾ ഉപയോഗിച്ച് ക്ലോസെറ്റുകൾ അടയ്ക്കുക. കക്കൂസ് മാലിന്യം പുറത്തേക്കൊഴുകുന്നത് തടയാനും സെപ്റ്റിക് ടാങ്കിലേക്ക് പുറമെ നിന്നുള്ള ചെളിയും മറ്റും കയറുന്നത് തടയാനും ഇത് ഉപകരിക്കും.
  • ജനലുകളും വാതിലുകളും നന്നായി അടയ്ക്കുക. നിങ്ങളുടെ വിലപിടിച്ച വസ്തുക്കൾ സുരക്ഷിതമായിരിക്കുന്നതിനും ഒപ്പം വെള്ളം അകത്തേക്ക് കടക്കുന്നത് പരമാവധി കുറയ്ക്കുന്നതിനും ഇതുമൂലം സാധിക്കും.
  • വളർത്തുമൃഗങ്ങളെ പൂട്ടിയിടാതിരിക്കുക, സുരക്ഷിതമായ സ്ഥലത്തേക്ക് മാറ്റുക.
  • വിലപ്പെട്ട രേഖകൾ സുരക്ഷിതമായി സൂക്ഷിക്കുക. എല്ലാ രേഖകളുടെയും സ്കാൻ/ഫോട്ടോ എടുത്ത് (മൊബൈലുപയോഗിക്കാം) മെയിൽ ചെയ്തിടുക/വാട്സാപ്പ് ചെയ്തിടുക. നഷ്ടപ്പെട്ടാലും പകരം ലഭിക്കുന്നതിന് സഹായകമാകും.
  • വെള്ളം കയറാൻ സാധ്യതയുണ്ടെങ്കിൽ വീട്ടുസാധനങ്ങൾ മുകളിലെ തട്ടുകളിൽ മുൻകൂട്ടി സുരക്ഷിതമായി വയ്ക്കുക. വെള്ളം കയറിത്തുടങ്ങിയാൽ അവ സുരക്ഷിതമാക്കാന്‍ പ്രയാസമായിരിക്കും.

വെള്ളപ്പൊക്കത്തിൽ എന്തെല്ലാം ശ്രദ്ധിക്കണം

  • വെള്ളപ്പൊക്കത്തിനിടെ വെള്ളത്തിലൂടെ നടക്കുന്നതും നീന്തുന്നതും സുരക്ഷിതമല്ല. കുത്തിയൊഴുകുന്ന അരയടി വെള്ളം നമ്മളെ താഴെ വീഴ്ത്തും. രണ്ടടി വെള്ളത്തിന് ഒരു കാറിനെ ഒഴുക്കി കൊണ്ടുപോകാൻ സാധിക്കും.
  • നദിയുടെയും കായലിന്റെയം കരയിലൂടെ സഞ്ചരിക്കരുത്.
  • കവിഞ്ഞൊഴുകുന്ന വെള്ളവുമായുള്ള സമ്പർക്കം തീർത്തും ഒഴിവാക്കുക. അത് മലിനവും അസുഖം പരത്തുന്നതുമാകും. അഥവാ വെള്ളവുമായി സമ്പർക്കത്തിൽ ഏർപ്പെട്ടാൽ ഉടൻ തന്നെ ശുദ്ധജലത്തിൽ നന്നായി കഴുകി വൃത്തിയാകുക.
  • വെള്ളത്തിലോ, വെള്ളത്തിനടുത്തോ കളിക്കാൻ കുട്ടികളെ അനുവദിക്കരുത്.
  • നിങ്ങള്‍ വെള്ളപ്പൊക്കബാധിതമായിരിക്കുകയും പോകാൻ മറ്റൊരിടവും ഇല്ലാതിരിക്കുയും ചെയ്താൽ തീർച്ചായായും പ്രാദേശിക സർക്കാരുകൾ ഒരുക്കുന്ന ദുരിതാശ്വാസ ക്യാമ്പുകളെ തീർച്ചയായും ആശ്രയിക്കുക. അതിലും മികച്ച, സുരക്ഷിതമായ ഇടം വേറെ ലഭിക്കില്ല. ദുരഭിമാനം നിങ്ങളുടെ ജീവന് തന്നെ ഭീഷണിയായേക്കാം.

വീട്ടിൽ കരുതേണ്ട എമർജൻസി കിറ്റ്

  • അത്യാവശ്യ ഫോൺ നമ്പരുകൾ ഒരു ബുക്കിൽ/കടലാസിൽ എഴുതി സൂക്ഷിക്കുക. മൊബൈൽ നഷ്ടപ്പെട്ടാലും മറ്റുള്ളവരെ ബന്ധപ്പെടാൻ ഉപകരിക്കും.
  • ഒരു ബാറ്ററി ടോർച്ച്, സ്പെയർ ബാറ്ററികൾ. വൈദ്യുതി ബന്ധം കുറെ നാളത്തേക്ക് വിശ്ചേദിക്കപ്പെട്ടേക്കാം.
  • അത്യാവശ്യ മരുന്നുകള്‍ അടങ്ങിയ പ്രഥമ ശുശ്രൂക്ഷാ കിറ്റ്
  • മൂന്ന് ദിവസത്തേക്കെങ്കിലുമുള്ള കുടിവെള്ളവും പാകം ചെയ്യാതെ കഴിക്കാൻ സാഘിക്കുന്ന ഭക്ഷണസാധനങ്ങളും. കുട്ടികൾക്കാവശ്യമായ ഭക്ഷണം.
  • പ്രധാനപ്പെട്ട രേഖകളുടെ ഫോട്ടോ കോപ്പികൾ. (റേഷൻ കാർഡ്, ആധാർകാർഡ്, ലൈസൻസ്, ഇൻഷ്വറൻസ് രേഖകൾ, പാസ്പോർട്ട്, ഇലക്ഷൻ തിരിച്ചറിയൽ രേഖ മുതലായവ) ഇവ വെള്ളം കടക്കാത്ത ഒരു കൂടിലിട്ട് സൂക്ഷിക്കുക.
  • പെൻസിൽ, കടലാസ്, ചെറിയ കത്തി, വിസിൽ.
  • വീടിന്റെയും വാഹനത്തിന്റെയും സ്പെയർ താക്കോലുകൾ.

യാത്രയിൽ കരുതേണ്ട അവശ്യവസ്തുക്കൾ

  • യാത്രയ്ക്കാവശ്യമായ വസ്ത്രങ്ങൾ (മഴക്കോട്ട്, കുട, പുതപ്പ് മുതലായവ)
  • തിന്നാൻ പാകത്തിലുള്ള ആഹാരം, കുടിവെള്ളം, ചൂട് വെള്ളം (ഫ്ലാസ്കിൽ)
  • മൊബൈൽ ഫോൺ ചാർജർ
  • അത്യാവശ്യ മരുന്നുകൾ
  • പേഴ്സ്, പണം, .ടി.എം. കാർഡ്
  • പ്രധാന ഫോൺ നമ്പരുകൾ എഴുതി സൂക്ഷിച്ചത്.
  • കുട്ടികൾക്കാവശ്യമായ ഭക്ഷണം.

നിങ്ങളുടെ ‘കൂടെ’ ആരുണ്ട്?

സിനിമാ നിരൂപണം – കൂടെ

ഒരുപാട് ആളുകള്‍ ചുറ്റുമുണ്ടെങ്കിലും നിങ്ങളുടെ കൂടെ ആരുണ്ട്? കൂടെയുള്ളവരെ പോലും നിങ്ങള്‍ പലപ്പോഴും തിരിച്ചറിയാതെ പോകുന്നുണ്ടോ? കാതങ്ങള്‍ അകലെയായിരിക്കുമ്പോഴും നിങ്ങളുടെ കൂടെ പലരും ഉണ്ടായിരുന്നെന്ന് നിങ്ങള്‍ അറിഞ്ഞിരുന്നോ? കൂടെയുണ്ടെന്ന് നിങ്ങള്‍ കരുതുന്നവരൊക്കെ യഥാര്‍ത്ഥത്തില്‍ നിങ്ങളുടെ കൂടെയുണ്ടോ?

Koode film poster
ചിത്രത്തിന് കടപ്പാട് – justdial.com

മതിപ്പ്‌ : ★ ★ ★ ★ ☆


ലയാളത്തില്‍ ഇറങ്ങിയിട്ടുള്ള മനഃശാസ്ത്രസിനിമകളില്‍ എന്തുകൊണ്ടും വ്യത്യസ്തമായ ഒന്നാണ് അഞ്ജലി മേനോന്റെ കൂടെ. ‘മനശാസ്ത്രസിനിമ’ എന്ന് കേള്‍ക്കുമ്പോള്‍ മനസ്സിലേക്ക് വരുന്നത് മണിച്ചിത്രത്താഴുപോലെ മനോരോഗം പ്രമേയമാക്കിയ സിനിമകളോ, അല്ലങ്കില്‍ കുറ്റാന്വേഷണം പ്രമേയമാക്കിയ സിനിമകളോ ആണ്. എന്നാല്‍ കൂടെ കുടുംബ പശ്ചാത്തലത്തില്‍ ബന്ധങ്ങളുടെ തീവ്രത വരച്ചുകാട്ടുന്ന ഒരു സിനിമയാണ്.

സ്വതേ അന്തര്‍മുഖനായ ജോഷ്വ എന്ന കൗമാരക്കാരന് ഏറെ വൈകി, തന്റെ ഹൈസ്കൂള്‍ പഠനകാലത്ത് ലഭിക്കുന്ന കൂടപ്പിറപ്പാണ് ജനി. ജനിക്ക് ആ പേരിട്ടതും അവനാണ്. ജോഷ്വയ്ക്ക് ജനിയോടുള്ള സ്നേഹത്തിന്റെ ആഴം മനോഹരമായ ദൃശ്യങ്ങളിലൂടെ സംവിധായിക കാട്ടിത്തരുന്നുണ്ട്. ജനിക്കാന്‍ പോകുന്ന കൂടെപ്പിറപ്പിന് കളിപ്പാട്ടങ്ങള്‍ കൊണ്ടലങ്കരിച്ച ഒരു മുറി തന്നെ ജോഷ്വ ഒരുക്കിയിരുന്നു. അവന്റേതായ ഒരു ലോകത്ത് അവന്‍ ഏറെ ഇഷ്ടപ്പെടുന്ന ഫുട്ബോള്‍, ഫുട്ബോള്‍ കോച്ച്, പിന്നെ സോഫി എന്ന കളിക്കൂട്ടുകാരി എന്നിവരോടൊപ്പം ജനിയും കൂടിച്ചേര്‍ന്ന് ജീവിതം മനോഹരമായി മുന്നേറുമ്പോഴാണ്, എന്നുവേണമെങ്കിലും മരണപ്പെട്ടു പോകാവുന്ന അസുഖത്തിനിരയാണ് ജനിയെന്ന വാര്‍ത്ത അവനെയും കുടുംബത്തെയും ഒരു പോലെ തകര്‍ക്കുന്നത്. എന്ത് വിറ്റും മകളുടെ ജീവന്‍ വിട്ടുകൊടുക്കില്ല എന്ന പിതാവിന്റെ നിശ്ചയത്തിനൊടുവില്‍ ജോഷ്വ എന്ന പതിനഞ്ചുകാരന്‍, ഒരു കുടുംബ സുഹൃത്തിനൊപ്പം ഗള്‍ഫിലേക്ക് ജോലിക്കായി അയക്കപ്പെടുന്നു. സ്നേഹിച്ച് കൊതി തീരും മുമ്പ് വീട്ടില്‍ നിന്നും അടര്‍ത്തി മാറ്റപ്പെട്ടവന്റെ മാനസിക സംഘര്‍ഷങ്ങളാണ് സിനിമയുടെ പ്രമേയം.

അഞ്ജലി മേനോൻ | ചിത്രത്തിന് ടൈംസ് ഓഫ് ഇന്ത്യയോട് കടപ്പാട്
അഞ്ജലി മേനോൻ | ചിത്രത്തിന് ടൈംസ് ഓഫ് ഇന്ത്യയോട് കടപ്പാട്

ഇരപതാം വയസ്സില്‍ ജനി മരണപ്പെടുന്ന വാര്‍ത്ത അറിയുന്ന ജോഷ്വയിലൂടെയാണ് സിനിമ ആരംഭിക്കുന്നത്. ഏതോ എണ്ണക്കമ്പനിയുടെ വലിയ ടാങ്ക് വൃത്തിയാക്കുമ്പോഴാണ് അവനാ വാര്‍ത്തയറിയുന്നത്. മനസ്സിന്റെ ഉള്ളിലൂടെ കഥപറയാന്‍ പോകുന്ന സംവിധായിക, ആദ്യ ദൃശ്യം അങ്ങനെ മനോഹരമാക്കിയിരിക്കുന്നു.

ജോഷ്വാ ചെറുപ്പത്തില്‍ ചൂഷണം ചെയ്യപ്പെട്ടവനാണെന്നു് സിനമ പലയിടത്തും സൂചിപ്പിക്കുന്നുണ്ട്. നന്നേ ചെറുപ്പത്തില്‍ തന്നെ അടര്‍ത്തി മാറ്റിയ അച്ഛനും അമ്മയും തന്നെ ചൂഷണം ചെയ്യുകയായിരുന്നു എന്ന് അവന്‍ കരുതുന്നു. ഒറ്റപ്പെടലിന്റെ വേദനയില്‍ നീറിപ്പുകയുന്ന ജോഷ്വയ്ക്ക് മാതാപിതാക്കളോട വിദ്വേഷമാണുള്ളത്. എന്നാല്‍ അവന്റെയുള്ളില്‍ അവന്‍പോലും അറിയാതെ മൂടിക്കിടക്കുന്ന വൈകാരിക സ്നേഹവും, ജനിയടക്കം തന്റെ കുടുംബാംഗങ്ങള്‍ക്ക് തന്നോടുള്ള സ്നേഹവും അവന്‍ പിന്നീട് തിരിച്ചറിയുന്നു.

നസ്രിയ - കൂടെയില്‍ koode review
നസ്രിയ കൂടെയില്‍ | ചിത്രത്തിന് ടൈംസ് ഓഫ് ഇന്ത്യയോട് കടപ്പാട്

മരണപ്പെട്ട ജനിയെ അവന്‍ കാണുന്നു. അവളുമായി സംസാരിക്കുകയും (അവളാണ് സംസാരിക്കുന്നത്!) യാത്രചെയ്യുകയും ചെയ്യുന്നു. ആ യാത്രയിലൂടെയാണ് കഥ പറഞ്ഞുപോകുന്നത്. ആ യാത്രയില്‍ അവന്‍ തന്റെ കളിക്കൂട്ടുകാരിയും വിവാഹമോചനം നേടിയവളുമായ സോഫിയെ അറിയുന്നു, അവള്‍ക്ക് തണലാകുന്നു. അശരണനാക്കപ്പെട്ട തന്റെ ബാല്യകാല കോച്ചിനെ ജീവിതത്തിലേക്ക് തിരിച്ച് നടത്തുന്നു. എന്തിന്, തന്റെ പിതാവ് പുറത്തുകാണിക്കാതെ ഒളിച്ചുവച്ച അവനോടുള്ള സ്നേഹത്തിന്റെ ആഴം തിരിച്ചറിയുന്നു. ഊട്ടിയുടെ പശ്ചാത്തലത്തില്‍ അതിമനോഹരമായാണ് ഓരോ ദൃശ്യവും അവതരിപ്പിക്കുന്നത്. എന്നാള്‍ നമ്മള്‍ സിനിമയില്‍ ഇതുവരെ കണ്ടിച്ചുള്ള പരമ്പരാഗത കാഴ്ചകളല്ല താനും.

പൃഥ്വിരാജാണ് പ്രധാന കഥാപാത്രത്തെ അവതരിപ്പിക്കുന്നത്. അന്തര്‍മുഖനായ ജോഷ്വയുടെ ശരീരഭാഷ പൃഥ്വി അസ്സലാക്കിയിരിക്കുന്നു. ഒരിടവേളയ്ക്ക് ശേഷം അഭിയലോകത്തേയ്ക്ക് തിരിച്ചെത്തി, ജനിയെ അവതരിപ്പിക്കുന്ന നസ്രിയ തന്റെ ഭാഗം ഗംഭീരമാക്കി. സോഫിയെ അവതരിപ്പിക്കുന്ന പാര്‍വ്വതി, മുഴുനീള കഥാപാത്രമല്ലാതിരുന്നിട്ടും തന്റെ ക്ലാസ്സ് അഭിനയം കാഴ്ചവച്ചിട്ടുണ്ട്. സംവിധായകന്‍ രഞ്ജിത്താണ് അച്ഛനായി വേഷമിടുന്നത്.

koode-revire-5
രഞ്ജിത്തും മാല പാര്‍വ്വതിയും കൂടെയില്‍ | ചിത്രത്തിന് മനോരമ ഓണ്‍ലൈനോട് കടപ്പാട്

ജോഷ്വയുടെ കഥയാണെങ്കിലും ഒരുപാട് പേരുടെ കഥകള്‍ ചിത്രത്തില്‍ പറയുന്നുണ്ട്. പെണ്ണും വിവാഹബന്ധം വേര്‍പെടുത്തിയതുമായ ഒരുവള്‍ സ്വന്തം വീട്ടില്‍ പോലും അനുഭവിക്കുന്ന ചൂഷണങ്ങളുടെ കഥ സോഫിയിലൂടെയും, മികച്ച ഒരു സാങ്കേതിക വിദഗ്ദനാകുമെന്ന പ്രതീക്ഷിച്ച മിടുക്കനായ മകനെ പഠനം മുടക്കി ഗള്‍ഫിലയക്കേണ്ടി വന്ന പിതാവിന്റെ വേദന, ജീവിതത്തിന്റെ ഏതെങ്കിലും നിമിഷത്തില്‍ മറ്റുള്ളവര്‍ക്കായി നല്‍കിയ സ്നേഹം എന്നെങ്കിലും തിരിച്ചു കിട്ടുമെന്ന് കാണിക്കുന്ന കോച്ചിന്റെ കഥ, മനുഷ്യനൊപ്പം പ്രാധാന്യം നല്‍കി, സിനിമയിലുടനീളം കാണുന്ന ബ്രൗണി എന്ന നായുടെ കഥ, തന്നെ ഉപേക്ഷിച്ചു പോയ കാമുകിയ്ക്ക് സുഖമില്ലന്നറിഞ്ഞ്, വാര്‍ദ്ധക്യത്തില്‍ ജന്മനാട്ടിലേക്ക് തിരിച്ചുപോയ സായിപ്പിന്റെകഥ, സായിപ്പ് സൂക്ഷിക്കാനായി ഏല്പിച്ചു പോയ വാനിന്റെ കഥ… അങ്ങനെ നിരവധി കഥകള്‍ സിനിമയില്‍ ഉള്‍ച്ചേര്‍ന്നിരിക്കുന്നു.

koode-review-3
പ്രിഥ്വിരാജും പാര്‍വ്വതിയും | ചിത്രത്തിന് മനോരമ ഓണ്‍ലൈനോട് കടപ്പാട്

മാലാ പാര്‍വതി, ദേവന്‍, റോഷന്‍ മാത്യൂ, പോളി വല്‍സണ്‍ എന്നിവര്‍ മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നു. എം. ജയചന്ദ്രനോടൊപ്പം കര്‍ണാകട സംഗീസംവിധായകന്‍ രഘു ദീക്ഷിത്തും ചേര്‍ന്ന് ഗാനങ്ങള്‍ക്ക് മനോഹരമായി ഈണം നല്‍കിയിരിക്കുന്നു. പശ്ചാത്തലസംഗീതം നിര്‍വ്വഹിച്ചിരിക്കുന്നതും രഘു ദീക്ഷിതാണ്.

സംവിധായികയുടെ മുന്‍ ചിത്രമായ ബാംഗ്ലൂര്‍ ഡെയ്സിന്റെ പ്രതീക്ഷയില്‍ ഈ ചിത്രം കാണരുത്. കുടുംബ ബന്ധങ്ങളുടെ തീവ്രത എന്ന സാമ്യമൊഴിച്ചാല്‍ പ്രമേയവും അവതരണ രീതിയും ഒക്കെ വ്യത്യസ്തമാണ്. ഒരു പക്കാ വിനോദസിനിമ എന്ന രീതിയല്ല അഞ്ജലി സ്വീകരിച്ചിരിക്കുന്നത്. ഞാന്‍ കൂടി സംസാരിച്ചില്ലെങ്കില്‍ ഇതൊരു അവാര്‍ഡ് പടമായി പോയേനെഎന്ന് ജെനി യാത്രയ്ക്കിടയില്‍ പറയുന്നുപോലുമുണ്ട്. എങ്കിലും സിനിമ സാധാരണക്കാരായ പ്രേഷകരെ പോലും നിരാശപ്പെടുത്തില്ല എന്ന് ഉറപ്പായും പറയാം.


പിന്‍കുറിപ്പ്:

“കാശ് പോകുമോ?”

“ഇല്ല.”

“എന്നാ പോയി കാണാം ല്ലേ?”

“പോയി കണ്ടോന്നേ…”

തണലും തീയും

ജീവിതം പൊരിവെയിലായിരുന്നു
നീയൊരു തണല്‍മരവും
നിന്നെയോര്‍ക്കുമ്പോഴിപ്പൊഴും
ഉള്ളിലാ ചിത്രം മാത്രം….

മോഹമെന്നില്‍ കൂടൊരുക്കുമ്പോള്‍
എന്നിലെന്നോട് ഞാൻ പറഞ്ഞത്
പച്ചയാണ്, തണലാണവള്‍, ഞാനോ
കാട്ടുതീ, അവള്‍ വെന്തുപോകും

നിന്നെവിട്ടകന്നു ഞാന്‍ പോകെ
കാത്തുകാത്തു നീ കാലം കഴിക്കവേ
ഉള്ളുവിങ്ങി നീയോര്‍ത്തിരിക്കാം
എന്തു നേടി ഞാന്‍, ജീവിതപ്പാതയില്‍

നീയൊരു മരം, ചുടലയാണ് ഞാന്‍
നീ തണല്‍, ഞാന്‍ അജവാഹനൻ
ഞാന്‍ പടുത്തതും  നീ വെടിഞ്ഞതും, ചാമ്പല്‍,
ഞാനതില്‍ മൂടി നീറി നീറി…

നൂറ്റാണ്ടിലെ ദൈര്‍ഘ്യമേറിയ പൂര്‍ണ്ണ ചന്ദ്രഗ്രഹണം – ജൂലൈ 27,28 തീയതികളില്‍

ഈ നൂറ്റാണ്ടിലെ ഏറ്റവും ദൈര്‍ഘ്യമേറിയ പൂര്‍ണ്ണ ചന്ദ്രഗ്രഹണം ജൂലൈ മാസം 27,28 തീയതികളിലാണ്. ഇന്ത്യയുള്‍പ്പെടുന്ന കിഴക്കന്‍ രാജ്യങ്ങളിലാണ് ഗ്രഹണം ദൃശ്യമാകുക.

Lunar eclipse January 31 2018 California Alfredo Garcia Jr mideclipseപൂര്‍ണ്ണഗ്രഹണ സമയത്ത് ചുവപ്പ് നിറത്തില്‍ കാണപ്പെടുന്ന ചന്ദ്രന്‍

കദേശം ഒന്നേമുക്കാല്‍ മണിക്കൂര്‍ നീണ്ടു നില്‍ക്കുന്ന ചന്ദ്രഗ്രഹണം രാത്രി 10.44നാണ് ഇന്ത്യയില്‍ ആരംഭിക്കുക. ഭൂമിയുടെ നിഴലിലൂടെ ചന്ദ്രന്‍ കടന്നുപോകുന്നതുമാലമാണ് ചന്ദ്രഗ്രഹണം അനുഭവപ്പെടുന്നത്. പൂര്‍ണ്ണ ചന്ദ്രഗ്രഹണ സമയത്ത് ചന്ദ്രമുഖം ഇളം ചുവപ്പ് നിറത്തില്‍ ദൃശ്യമാകുന്നതിനാല്‍ ഇതിനെ രക്തചന്ദ്രന്‍ എന്നും വിളിക്കുന്നു.

ചന്ദ്രഗ്രഹണം ഉണ്ടാകുന്നത് എങ്ങനെ?

പൗര്‍ണമിയില്‍ മാത്രം അനുഭവപ്പെടുന്ന പ്രതിഭാസമാണ് ചന്ദ്രഗ്രഹണം. പൗര്‍ണമി ദിവസം ഭൂമി ഇടയിലും സൂര്യന്‍, ചന്ദ്രന്‍ എന്നിവ ഇരുവശങ്ങളിലുമായി ഏകദേശം നേര്‍രേഖയില്‍ വരുന്നു. എന്നാല്‍ എപ്പോഴെങ്കിലും ഇവ മൂന്നും കൃത്യം നേര്‍ രേഖയില്‍ വന്നാല്‍, ചന്ദ്രനില്‍ പതിയ്ക്കേണ്ട സൂര്യ പ്രകാശത്തെ ഭൂമി തടയുകയും ചന്ദ്രന്‍ ഭൂമിയുടെ നിഴലിലാവുകയും ചെയ്യുന്നു. ഇങ്ങനെയാണ് ചന്ദ്രഗ്രഹണം ഉണ്ടാകുന്നത്. എല്ലാ പൗര്‍ണമിയിലും ചന്ദ്രഗ്രഹണം ഉണ്ടാകാത്തിനു കാരണം ഭൂമി, സൂര്യന്‍, ചന്ദ്രന്‍ ഇവ കൃത്യം നേര്‍ രേഖയില്‍ വരാത്തതാണ്. അപ്പോള്‍ ഭൂമിയുടെ നിഴല്‍ ചന്ദ്രനില്‍ പതിക്കാതെ അല്പം മാറിയാകും പതിക്കുക.

Animation July 27 2018 lunar eclipse appearance2018 ചന്ദ്രഗ്രഹണത്തിന്റെ ചലിതചിത്രീകരണം – By Tomruen [CC BY-SA 4.0 (https://creativecommons.org/licenses/by-sa/4.0)%5D, from Wikimedia Commons

നക്ഷത്രനിരീക്ഷകര്‍ക്ക് അന്നേദിവസം ഗ്രഹണ സമയത്തുതന്നെ അധിക വലിപ്പത്തിലും അധിക പ്രഭയിലും ചൊവ്വയെയും നിരീക്ഷിക്കാം എന്ന സൗകര്യവുമുണ്ട്. ഈ സമയത്ത് ചൊവ്വ ഭൂമിയോട് ഏറ്റവും അടുത്തുകൂടിയാണ് കടന്നുപോകുന്നത്.

രക്തചന്ദ്രന്‍ (Blood Moon)

ഭൂമിയുടെ നിഴല്‍ ചന്ദ്രനെ പൂര്‍ണമായും മറയ്ക്കുമ്പോഴാണല്ലോ പൂര്‍ണ്ണ ചന്ദ്രഗ്രഹണം ഉണ്ടാവുക. അപ്പോള്‍ ചന്ദ്രമുഖം പൂര്‍ണ്ണമായും അദൃശ്യമാവുകയാണ് വേണ്ടത്. എന്നാല്‍ സംഭവിക്കുന്നത് തികച്ചും മറ്റൊന്നാണ്. ഭൂമിയുടെ നിഴലില്‍ പൂര്‍ണ്ണമായും പ്രവേശിക്കുന്ന ചന്ദ്രന്‍ മങ്ങിയ ചുവപ്പ് നിറത്തില്‍ ദൃശ്യമാകും. ഏതാണ്ട് സന്ധ്യാകാശത്തിലെ സൂര്യനെ പോലെ. ഇതിനെയാണ് രക്തചന്ദ്രന്‍ (Blood Moon) എന്ന് വിളിക്കുന്നത്.  ചുവപ്പ് ചന്ദ്രന്‍ (Red Moon), ചെമ്പന്‍ ചന്ദ്രന്‍ (Copper Moon) എന്നീ പേരുകളിലും ഇത് അറിയപ്പെടുന്നു. ഭൂമിയുടെ അന്തരീക്ഷമാണ് ഇത്തരം ഒരു കാഴ്ചയ്ക്ക് കാരണം.

ഭൂമിയുടെ നിഴല്‍ ചന്ദ്രനെ പൂര്‍ണമായും മറയ്ക്കുമ്പോഴാണല്ലോ പൂര്‍ണ്ണ ചന്ദ്രഗ്രഹണം ഉണ്ടാവുക. അപ്പോള്‍ ചന്ദ്രമുഖം പൂര്‍ണ്ണമായും അദൃശ്യമാവുകയാണ് വേണ്ടത്. എന്നാല്‍ സംഭവിക്കുന്നത് തികച്ചും മറ്റൊന്നാണ്. ഭൂമിയുടെ നിഴലില്‍ പൂര്‍ണ്ണമായും പ്രവേശിക്കുന്ന ചന്ദ്രന്‍ മങ്ങിയ ചുവപ്പ് നിറത്തില്‍ ദൃശ്യമാകും. ഏതാണ്ട് സന്ധ്യാകാശത്തിലെ സൂര്യനെ പോലെ. ഇതിനെയാണ് രക്തചന്ദ്രന്‍ (Blood Moon) എന്ന് വിളിക്കുന്നത്.  ചുവപ്പ് ചന്ദ്രന്‍ (Red Moon), ചെമ്പന്‍ ചന്ദ്രന്‍ (Copper Moon) എന്നീ പേരുകളിലും ഇത് അറിയപ്പെടുന്നു. ഭൂമിയുടെ അന്തരീക്ഷമാണ് ഇത്തരം ഒരു കാഴ്ചയ്ക്ക് കാരണം.

Blood Moon Graphic Malayalam

ഭൂമിയുടെ അന്തരീക്ഷത്തില്‍ കൂടി കടന്നുപോകുന്ന സൂര്യപ്രകാശത്തിന്റെ കുറച്ചുഭാഗം അപവര്‍ത്തനത്തിനും വിസരണത്തിനും വിധേയമായി ഭൂമിയുടെ നിഴല്‍ ഭാഗത്തേയ്ക്ക് വളഞ്ഞ് ചന്ദ്രനില്‍ പതിയ്ക്കുന്നു. ഈ പ്രകാശ രശ്മികള്‍ അവിടെ നിന്നും പ്രതിഫലിച്ച് വീണ്ടും ഭൂമിയില്‍ പതിയ്ക്കുമ്പോള്‍ ചന്ദ്രമുഖം നമുക്ക് ദൃശ്യമാകുന്നു. എന്നാല്‍ ദൃശ്യപ്രകാശത്തിലെ തരംഗദൈര്‍ഘ്യം കുറഞ്ഞ വര്‍ണ്ണങ്ങളായ വയലറ്റ്, നീല, പച്ച നിറങ്ങള്‍ ഏതാണ്ട് പൂര്‍ണ്ണമായും വിസരണത്തിന് വിധേയമായി ഭൂമിയില്‍ നിന്ന് ചന്ദ്രനിൽ പതിക്കാതെ പോകുന്നു. അതു കൊണ്ട് ആ നിറങ്ങൾ  തിരികെ എത്തുന്നില്ല. തരംഗ ദൈര്‍ഘ്യം കൂടിയ ഓറഞ്ച്, ചുവപ്പ് നിറങ്ങള്‍ മാത്രം ചന്ദ്രനില്‍ നിന്നും പ്രതിഫലിച്ച് നമ്മുടെ കണ്ണുകളില്‍ എത്തുമ്പോള്‍ ചുവന്ന നിറത്തിലുള്ള ചന്ദ്രനെ നാം കാണുന്നു. അതായത് പൂര്‍ണ്ണ ചന്ദ്രഗ്രഹണ സമയത്ത് പൂര്‍ണ്ണമായും അദൃശ്യമാകുന്നതിന് പകരം ചന്ദ്രന്‍ മങ്ങിയ ചുവപ്പ് നിറത്തില്‍ ദൃശ്യമാവുകയാണ് ചെയ്യുക. ഭാഗീക ചന്ദ്രഗ്രഹണ സമയത്ത് ചന്ദ്രന്റെ പ്രഭമൂലം നമുക്ക് ചന്ദ്രന്റെ ഇരുണ്ട ഭാഗം ഇപ്രകാരം കാണാന്‍ കഴിയില്ല.

കേരളത്തിലെ സമയക്രമം

കേരളത്തില്‍ 27ന് രാത്രി 11 മണിയോടെ ചന്ദ്രന്‍ ഭൂമിയുടെ ഭാഗിക നിഴല്‍ പ്രദേശത്തേക്ക് കടക്കുന്നതായി നിരീക്ഷിക്കാം. അര്‍ദ്ധരാത്രി 12.05-ഓടെ ഭാഗിക ഗ്രഹണം ആരംഭിക്കും. 28 ന് പുലര്‍ച്ചെ 1 മണിയോടെ ചന്ദ്രന്‍ പൂര്‍ണ്ണമായി ഭൂമിയുടെ നിഴലിലാകും. പൂര്‍ണ്ണ ഗ്രഹണം സംഭവിക്കും. പുലര്‍ച്ചെ 2.45 വരെ ഈ നില തുടരും. പിന്നീട് ചന്ദ്രന്‍ ഭാഗിക നിഴല്‍ പ്രദേശത്തേക്ക് പ്രവേശിക്കുകയം 3.45ഓടെ ഗ്രഹണത്തില്‍ നിന്നും പൂര്‍ണ്ണമായും പുറത്ത് വരികയും ചെയ്യും.

ചന്ദ്രഗ്രഹണം നിരീക്ഷിക്കുന്നത് സുരക്ഷിതമാണോ?

നഗ്നനേത്രങ്ങൾകൊണ്ട് ചന്ദ്രഗ്രഹണം നിരീക്ഷിക്കുന്നത്  പൂര്‍ണമായും സുരക്ഷിതമാണ്. ചന്ദ്രന്  സ്വന്തമായി പ്രകാശം ഇല്ല എന്ന് അറിയാമല്ലോ. സൗരവികിരണം പ്രതിഫലിപ്പിക്കുകയാണ് ചന്ദ്രന്‍ ചെയ്യുന്നത്. ചന്ദ്രനിൽ നിന്നുള്ള വെളിച്ചം വളരെ തീവ്രത കുറഞ്ഞതും നിര്‍ദ്ദോഷവുമാണ്. ഗ്രഹണ സമയത്ത് അതിന്റെ തീവ്രത വീണ്ടും കുറയുകയും ചെയ്യുന്നു. അതിനാൽ ചന്ദ്രഗ്രഹണം കാണുന്നതിന് യാതൊരു ദോഷവും ഇല്ല.

ഈ വര്‍ഷം സംഭവിക്കുന്ന രണ്ടാമത്തെ പൂര്‍ണ്ണചന്ദ്രഗ്രഹണമാണ് ജൂലൈയിലേത്. ആദ്യത്തേത് ജനുവരി 31ന് ആയിരുന്നു. അന്നത് ആഘോഷപൂര്‍വ്വമാണ് കേരള ജനത ഏറ്റെടുത്തത്. എന്തായാലും ഒരു ചന്ദ്രോത്സവം തന്നെ ഒരുക്കി കൗതുകകരമായ ഈ പ്രതിഭാസത്തെ നമുക്ക് വീണ്ടും അവിസ്മരണീയമാക്കാം.

ഒരു പഠനപ്രോജക്ട് എങ്ങനെ നിര്‍വ്വഹിക്കാം

കുട്ടികൾക്ക് (അദ്ധ്യാപക‍ർക്കും രക്ഷിതാക്കൾക്കും) പ്രോജക്ട് പ്രവര്‍ത്തങ്ങൾ എന്നും ഒരു കീറാമുട്ടിയാണ്. എന്ത് ചെയ്യണം, എങ്ങനെ ചെയ്യണം, എങ്ങനെ അവതരിപ്പിക്കണം എന്നെല്ലാമുള്ള സംശയങ്ങള്‍ കൂടെപ്പിറപ്പാണ്. റിപ്പോര്‍ട്ട് എഴുതി തയ്യാറാക്കുന്നതാണ് പ്രോജക്ട് പ്രവര്‍ത്തനം എന്നാണ് നല്ലൊരു പങ്കും ധരിച്ചിരിക്കുന്നത്. പ്രോജക്ട് പ്രവര്‍ത്തനങ്ങളില്‍ ഏര്‍പ്പെടുന്നവര്‍ക്കായി ഒരു കുറിപ്പ്.

എന്താണ് പഠന പ്രോജക്ട്

ഒരു പഠനലക്ഷ്യം നിർണയിച്ച് അതിനുവേണ്ട സാമഗ്രികൾ കണ്ടെത്തി കൂട്ടായോ മറ്റുള്ളവരുടെ സഹായത്തോടെയോ പ്രവർത്തിച്ച് ലക്ഷ്യം നേടുക – പഠനപ്രോജക്ടിനെ ഇങ്ങനെ ചുരുക്കി നിർവ്വചിക്കാം. സ്കൂളിൽ ചെയ്തുവരുന്ന പല പഠന പ്രോജക്ടുകളും വ്യക്തിഗതമാണെങ്കിലും അത് പൂർത്തിയാക്കുന്നതിൽ നിങ്ങളോടൊപ്പം നിങ്ങളുടെ അധ്യാപകരും രക്ഷിതാക്കളും സഹ്യത്തുക്കളുമൊക്കെ പങ്കാളികളാകുന്നു. അങ്ങനെ അതൊരു കൂട്ടായ പ്രവർത്തനമായി മാറുന്നു.

പ്രോജക്ടിന്റെ ഭാഗമായി എന്തൊക്കെ ചെയ്യാം

അന്വേഷണം, പരീക്ഷണം, നിരീക്ഷണം, ശേഖരണം, പ്രദർശനം തയ്യാറാക്കൽ ഇവയെല്ലാം പഠന പ്രോജക്ടിന്റെ ഭാഗമാകാം. ഇവയൊക്കെ മുൻപറഞ്ഞ നിർവചനത്തിൻ കീഴിൽ വരുന്നു. ബാലശാസ്ത്രകോൺഗ്രസ്സിനെ സംബന്ധിച്ച് നമ്മൾ ചെയ്യുന്ന പ്രോജക്ട് അന്വേഷണ പ്രോജക്ടുകളാണെന്ന് മാത്രം.

പഠന പ്രോജക്ടിന്റെ വിവിധ ഘട്ടങ്ങൾ

പലരും ധരിച്ചു വച്ചിരിക്കുന്നത് റിപ്പോർട്ട് തയ്യാറാക്കലാണ് പ്രോജക്ട് പ്രവർത്തനം എന്നാണ്. എന്നാൽ ഇത് പ്രോജക്ട് പ്രവർത്തനത്തിന്റെ ഒരു ഘടകം മാത്രമാണ്. പ്രധാനപ്പെട്ട പ്രവർത്തനങ്ങളെല്ലാം അതിനു മുമ്പായി നടക്കേണ്ടതുണ്ട്. പഠനപ്രോജക്ടിന്റെ പ്രധാന ഘട്ടങ്ങൾ എന്തെല്ലാമെന്ന് പരിശോധിക്കാം.

1. ഒരു പ്രശ്നം അനുഭവപ്പെടുന്നു

തന്റെ ചുറ്റും കാണുന്ന നിരവധി വിഷയങ്ങളിൽ നിന്നും പ്രോജക്ടിനാവശ്യമായ ഒരു പ്രശ്നം ഉത്ഭവിക്കാം. ആ പ്രശ്നം പരിഹരിക്കുന്നതിനുള്ള അന്വേഷണമാണ് പ്രൊജക്ട് പ്രവർത്തനം. പാഠപുസ്തകത്തിൽ നിന്നോ, ദൈനംദിന പ്രവർത്തനങ്ങളിൽനിന്നോ, സാമൂഹ്യ പ്രവർത്തനങ്ങളിൽ നിന്നോ പ്രകൃതി പ്രതിഭാസങ്ങളിൽ നിന്നോ ഒക്കെ ഇത്തരം പ്രശ്നങ്ങൾ ഉത്ഭവിക്കാം. പഠനത്തിന്റെയോ പഠനപ്രവർത്തനത്തിന്റെയോ ഭാഗമായി ലഭിച്ച പ്രശ്നങ്ങളും പ്രൊജക്ട് പ്രവർത്തനത്തിന് കാരണമാകാം. ഇത്തരത്തിൽ പ്രത്യേകമായി ലഭിച്ച ഒരു പ്രശ്നമാണ് നിങ്ങളുടെ പ്രോജക്ടിന് ആധാരം. ഈ പ്രശ്നം പഠനവിധേയമാക്കുമ്പോൾ അത് പഠിക്കാനുണ്ടായ കാരണം, വിഷയം എങ്ങനെ കണ്ടെത്തി, ഈ വിഷയത്തിന് പാഠപുസ്തകവുമായോ ജീവിതവുമായോ അതിനുള്ള ബന്ധം ഇവയൊക്കെ പരിശോധിക്കണം.

ഒരു പഠന പ്രൊജക്ട് ചെയ്യുന്നതിനു മുമ്പായി നമ്മുടെ ലക്ഷ്യം കൃത്യമായി നിർവ്വചിക്കേണ്ടതുണ്ട്. അനുഭവപ്പെടുന്ന പ്രശ്നം വിശാലമായ ഒന്നാകാം. ഉദാഹരണത്തിന് കേരളത്തിലെ നെൽകൃഷിയെ പറ്റി ഒരു പ്രോജക്ട് ചെയ്യണമെന്ന് ആഗ്രഹിച്ചാലും കേരളമാകെ പഠനവിധേയമാക്കാൻ ഒരു കുട്ടിക്കാകില്ല. അതിനാൽ തന്റെ നാട്ടിലെ നെൽകൃഷിയുടെ അവസ്ഥമാത്രമേ അവന് പഠനവിധേയമാക്കാൻ സാധിക്കൂ. മാത്രമല്ല ലഭ്യമായ സമയം, ലഭ്യമായ സൗകര്യങ്ങൾ എന്നിവയെല്ലാം പരിഗണിച്ച് നമ്മുടെ ലക്ഷ്യം പരിമിതപ്പെടുത്തണം. അതായത് വളരെ വിശാലമായ ഒരു പ്രശ്നത്തെപ്പോലും നമ്മുടെ പരിമിതികൾക്കനുസരിച്ചും പ്രായോഗികതക്കനുസരിച്ചും വ്യത്യാസപ്പെടുത്തേണ്ടിവരും. അല്ലങ്കിൽ നമുക്ക് അത് ഫലപ്രഥമായി നിർവ്വഹിക്കാനാകില്ല. പ്രായോഗികമായി പൂർത്തിയാക്കാനാകാത്ത ഒരു പ്രോജക്ട് തെരഞ്ഞെടുക്കുന്നതിൽ അർത്ഥമില്ലല്ലോ. തുടര്‍ന്ന് പ്രോജക്ടിന്റെ തലക്കെട്ട് (ശീർഷകം) നിർണയിക്കണം. ഇത് ഒറ്റ വാക്യത്തിലോ വാചകത്തിലോ ആയിരിക്കണം. കൃത്യവും വ്യക്തവും ആയിരിക്കണം.

2 മുന്‍ വിവരങ്ങളുടെ പരിശോധന

ഒരു നല്ല പഠന പ്രോജക്ട് ചെയ്യുന്നതിനു മുമ്പ് അതുമായി ബന്ധപ്പെട്ട് ലഭ്യമായ മുന്‍ വിവരങ്ങള്‍ പരിശോധിക്കേണ്ടത് ആവശ്യമാണ്. നമുക്ക് ചെയ്യാനുള്ള പ്രവര്‍ത്തനത്തെപ്പറ്റി കൃത്യമായ ധാരണ ലഭിക്കുന്നതിനും അനാവശ്യമായ പണച്ചെലവ്, സമയനഷ്ടം എന്നിവ ഒഴിവാക്കുന്നതിനും ഇത് സഹായകമാണ്. ലഭ്യമായ മുന്‍ വിവരങ്ങള്‍/റിപ്പോര്‍ട്ടുകള്‍ പരിശോധിക്കുന്നത് നമ്മുടെ പ്രശ്നത്തെ പ്രായോഗികമായി എങ്ങനെ സമീപിക്കാം എന്നതിനെ പ്പറ്റിയും പ്രശ്നത്തിന്റെ സാധ്യമായ ഉത്തരങ്ങളെപ്പറ്റിയും മനസ്സിലാക്കാനും സഹായിക്കുന്നു. പത്ര-മാസികകള്‍, പുസ്തകങ്ങള്‍, ജേര്‍ണലുകള്‍, പഠന റിപ്പോര്‍ട്ടുകള്‍ എന്നിവയെയൊക്കെ ഇതിനായി ആശ്രയിക്കാം.

3. പരികല്പന രൂപപ്പെടുത്തല്‍

നമുക്ക് അനുഭവപ്പെട്ട പ്പശ്നത്തിന്റെ ഉത്തരം/പരിഹാരം തേടലാണല്ലോ നമ്മുടെ ലക്ഷ്യം. മുന്‍ വിവരങ്ങളുടെ പരിശോധനയില്‍ നിന്നോ പ്രശ്നത്തിന്റെ പ്രാഥമിക വിശകലനത്തില്‍ നിന്നോ ഉരുത്തിരിയുന്ന, അല്ലങ്കില്‍ ബുദ്ധിപരമായി ഊഹിക്കപ്പെടുന്ന ഉത്തരമാണ് പരികല്പന. ഒരു പ്രശ്നത്തില്‍ ഒന്നോ അതിലധികമോ പരികല്പനകള്‍ രൂപപ്പെടാം. മുന്‍ പഠന വിവരങ്ങളില്‍ നിന്നോ നിലവിലുള്ള സിദ്ധാന്തങ്ങളില്‍ നിന്നോ വ്യക്തിപരമായ നിരീക്ഷണങ്ങളില്‍ നിന്നോ അനുഭവങ്ങളില്‍ നിന്നോ ഒക്കെ പരികല്പന രൂപപ്പെടുത്തുന്നു.

നമ്മുടെ പ്രശ്നത്തിനുള്ള പ്രസ്താവനാരൂപത്തിലുള്ള താല്കാലിക ഉത്തരമാണ് പരികല്പന.

ഒരു നല്ല പരികല്പനയുടെ ചില പ്രത്യേകതകള്‍ താഴെ പറയുന്നു-

  • ലളിതവും സ്പഷ്ടവും ആയിരിക്കണം.
  • ശരിയാണോ എന്ന് പരീക്ഷിക്കാന്‍ കഴിയുന്ന ഒന്നായിരിക്കണം.
  • അളവുകളുടെ അടിസ്ഥാനത്തില്‍ പരിശോധിക്കാന്‍ സാധിക്കണം.
  • നിലനില്കുന്ന അറിവുമായി അതിന് ബന്ധമുണ്ടായിരിക്കണം.
  • ഒരു പരികല്പന സ്വീകരിക്കപ്പെടാനോ തള്ളിക്കളയാനോ ഉള്ള സാധ്യത തുല്യമായിരിക്കണം.

4. പരിശോധനാ ഘടകങ്ങളെ/ ശേഖരിക്കേണ്ട വിവരങ്ങളെ തിരിച്ചറിയുന്നു

ഒരു പരികല്പന ശരിയോ തെറ്റോ എന്ന് പരിശോധിക്കുന്നതിന് അതില്‍ ഉള്‍പ്പെട്ടിട്ടുള്ള പരിശോധനാ ഘടകങ്ങളെ (ചരങ്ങള്‍) തിരിച്ചറിയേണ്ടതുണ്ട്. ഒരു ഘടകത്തിന്റെ സ്വാധീനം മറ്റൊരു ഘടകത്തെ എങ്ങനെ ബാധിക്കുന്നു എന്ന് കണ്ടെത്തിയാലേ പരികല്പന പരിശോധിക്കാന്‍ കഴിയൂ. ഉദാഹരണത്തിന് വിവിധ പ്രകാശ സ്രോതസ്സുകള്‍ ഒരു വീട്ടിലെ വൈദ്യുത ചെലവിനെ എങ്ങനെ സ്വാധീനിക്കുന്നു എന്ന് ഒരു പ്രശ്നം ഉണ്ടായി. പ്രാഥമിക വിലയിരുത്തലില്‍ അല്ലങ്കില്‍ മുന്നറിവുകളുടെ അടിസ്ഥാനത്തില്‍ മനസ്സിലായ കാര്യം ഫിലമെന്റ് ബള്‍ബിന് വിലക്കുറവാണ് എന്നാല്‍ വൈദ്യുത ഉപയോഗം വളരെ കൂടുതലാണ്. സി.എഫ്.എല്‍ന് വില അല്പം കൂടുതലാണെങ്കിലും വൈദുത ഉപയോഗം കുറവായതിനാന്‍ ആകെ ചെലവ് കുറവാണ്. എല്‍.ഇ.ഡി. ബള്‍ബ് രണ്ടിനേക്കാളും കുറച്ച് വൈദ്യുതിയേ ഉപയോഗിക്കൂ.പക്ഷേ വില വളരെ കൂടുതലാണ്. അതിനാല്‍ സി.എഫ്. എല്‍ ആണ് ലാഭകരം. ഈ വിലയിരുത്തലില്‍ നിന്നും താഴെ പറയുന്ന പരികല്പന രൂപീകരിക്കുന്നു.

ഫിലമെന്റ് ബള്‍ബ്, എല്‍.ഇ.ഡി. ബള്‍ബ് എന്നിവയേക്കാള്‍ ലാഭകരം സി.എഫ്.എല്‍ ആണ്.

ഈ പരികല്പന തെറ്റാണോ ശരിയാണോ എന്ന് പരിശോധിക്കലാണ് പ്രോജക്ടിന്റെ പ്രധാന ഘട്ടം.

എന്തൊക്കെയാണ് പരിശോധിക്കേണ്ടത്.

  • വിവിധതരം ബള്‍ബുകളുടെ വില.
  • അവയുടെ വൈദ്യുത ഉപഭോഗം.
  • അവ എത്രകാലം ഉപയോഗിക്കാം?

ഇവയാണ് പരിശോധനാ ഘടകങ്ങൾ അഥവാ ചരങ്ങൾ. അവയ്ക്ക് ആവശ്യമായ മൂല്യങ്ങള്‍ നല്കി വിയിരുത്തല്‍ നടത്താം. ഒരു പരികല്പനയുടെ പരിശോധനാ ഘടകങ്ങളെ തിരിച്ചറിയുക എന്നത് പ്രധാനമാണ്.

5. അന്വേഷണത്തിനുള്ള രൂപരേഖ തയ്യാറാക്കുന്നു

പരികല്പനയെ പരിശോധനാ വിധേയമാക്കുന്നതിനാവശ്യമായ വിവരങ്ങള്‍ ശേഖരിച്ച്, വിവിധ ചരങ്ങള്‍ തമ്മിലുള്ള ബന്ധം മനസസ്സിലാക്കി പരികല്പനയെ തള്ളുകയോ കൊള്ളുകയോ ചെയ്യേണ്ടതുണ്ടല്ലോ. ഇതിനാവശ്യമായ ഒരു പ്രവര്‍ത്തന രൂപരേഖ തയ്യാറാക്കണം.

പ്രൊജക്ട് എങ്ങനെ പൂർത്തിയാക്കാം? എന്തെല്ലാം ചെയ്യണം? ആരൊക്കെ ഏതൊക്കെ പ്രവര്‍ത്തനങ്ങള്‍ ഏറ്റടുക്കും?എത്ര സമയത്തിനുള്ളിൽ ഓരോ പ്രവൃത്തിയും പൂര്‍ത്തിയാക്കും? ഇത്തരം കാര്യങ്ങൾ മുന്‍കൂട്ടി തീരുമാനിക്കുന്നതാണ് ആസൂത്രണം.

മുൻകൂട്ടി ആസൂത്രണം ചെയ്യുന്ന പ്രൊജക്ടുകൾ മാത്രമേ സമയബന്ധിതമായും ഫലപ്രദമായും ചെയ്തു തീർക്കാനാകൂ. ശേഖരിക്കേണ്ട വിവരങ്ങളുടെ അളവ്, തരം, സ്രോതസ്സ് എന്നിവ മനസ്സിലാക്കണം. സമയപരിധി, ഏതൊക്കെ പ്രവർത്തനങ്ങൾ ഏതേത് സമയത്തിനുള്ളിൽ ചെയ്യും തുടങ്ങിയവ തീരുമാനിക്കണം. ഇതനുസരിച്ച ഒരു പ്രവർത്തന കലണ്ടർ തയ്യാറാക്കണം.

6. പരീക്ഷണ-നിരീക്ഷണങ്ങള്‍ക്കും അളവുകള്‍ക്കുമുള്ള സാമഗ്രികള്‍ തയ്യാറാക്കുന്നു

അന്വേഷണത്തിന്റെ സ്വഭാവം അനുസരിച്ച് വിവരശേഖരണത്തിനും പരീക്ഷണങ്ങള്‍ക്കുമുള്ള വിവിധ സാമഗ്രികള്‍ രൂപപ്പെടുത്തണം. പരീക്ഷണം, നിരീക്ഷണം, സന്ദർശനം, സര്‍വ്വേ തുടങ്ങിയ വിവിധ രീതികളാണ് പൊതുവേ വിവരശേഖരണത്തിന് തെരഞ്ഞെടുക്കാറുള്ളത്. ചോദ്യാവലി, സർവ്വേ ഫോറം, അളവ് ഉപകരണങ്ങള്‍, ക്യാമറ, ശബ്ദം റെക്കോഡ് ചെയ്യുന്നതിനുള്ള ഉപകരണം, വിവരം രേഖപ്പെടുത്തുന്നതിനുള്ള പട്ടികകൾ തുടങ്ങിയവയാണ് സാധാരണയായുള്ള വിവരശേഖരണ സാമഗ്രികള്‍.

7. വിവരശേഖരണം.

വിവരശേഖരണത്തിന് പല മാർഗങ്ങളുണ്ട്. പരീക്ഷണം, സർവ്വേ, ഫീൽഡ് സ്റ്റഡി, നിരീക്ഷണം. ഇന്റർവ്യൂ തുടങ്ങിയവയൊക്കെ വിവരശേഖരണ മാർഗങ്ങളാണ്.

വിവരശേഖരണത്തിന്റെ ആദ്യ പടി പ്രോജക്ട് ഡയറി എഴുതിത്തുടങ്ങുകയാണ്. പ്രോജക്ട് പ്രവർത്തനം ആരംഭിക്കുന്നതു് മുതൽ അവസാനിക്കുന്നതു് വരെയുള്ള എല്ലാ കാര്യങ്ങളും അപ്പപ്പോൾ കുറിച്ചു വയ്ക്കുേണ്ടതുണ്ട്. ഇതിനുപയോഗിക്കുന്ന ബുക്കാണ് പ്രോജക്ട് ഡയറി. (ഇത് പ്രൊജക്ട് റിപ്പോർട്ടല്ല. ഇതിൽനിന്നുള്ള വിവരങ്ങള്‍ ഉപയോഗിച്ചാണ് പ്രോജക്ട് റിപ്പോർട്ട് തയ്യാറാക്കുന്നത്.)

അടുത്ത പടി സാമ്പിള്‍ തെരഞ്ഞെടുക്കുക എന്നതാണ്.  സാമ്പിൾ തെരഞ്ഞെടുക്കുമ്പോൾ സമൂഹത്തിലെ എല്ലാത്തരത്തിലുമുള്ള വ്യക്തിഗത യൂണിറ്റുകളെയും അത് പ്രതിനിധീകരിക്കുന്നു എന്ന് ഉറപ്പ് വരുത്തണം.

ശേഖരിക്കേണ്ട വിവരങ്ങളുടെ വ്യാപ്തി വലുതായിരിക്കുമ്പോൾ വിവരശേഖരണം പ്രയാസമാകുന്നു. ഇത് പരിഹരിക്കാനായി മുഴുവൻ സമൂഹത്തെയും പ്രതിനിധീകരിക്കുന്നതരത്തിൽ ചെറിയ ഒരു ഗ്രൂപ്പിനെ തെരഞ്ഞെടുക്കുന്നു. ഇതാണ് സാമ്പിൾ.

ഉദാഹരണത്തിന് ഒരു പഞ്ചായത്ത് വാർഡിലെ വീടുകളിലെ ശരാശരി വൈദ്യുത ഉപഭോഗം കണ്ടെത്തുന്നതിനു് വാർഡിലെ 500ൽ അധികം വീടുകളിൽ സർവ്വേ നടത്തേണ്ടി വരും. ഇത് പ്രയാസകരമാണ്. എന്നാൽ ഈ മുഴുവൻ വീടുകളെയും പ്രതിനിധീകരിക്കുന്ന തരത്തിൽ പത്തോ ഇരുപതോ വീടുകളെ സാമ്പിളായി തെഞ്ഞെടുക്കാവുന്നതാണ്. ഈ സാമ്പിളിൽ എല്ലാത്തരത്തിലുമുള്ള (ഉപഭോഗം കുറഞ്ഞത്, വളരെ കൂടുതലുള്ളത്, ശരാശരി ഉപഭോഗമുള്ളത് തുടങ്ങിയവ) വീടുകളും ഉൾപ്പെടാൻ ശ്രദ്ധിക്കണമെന്നു മാത്രം.

മുമ്പ് പറഞ്ഞരീതിയിലുള്ള സാമഗ്രികളുടെ സഹായത്തോടെ, അനുയോജ്യമായ സാമ്പിൾ തെരഞ്ഞെടുത്ത് വിവരശേഖരണം നടത്താം.

8. ലഭിച്ച വിവരങ്ങളെ അപ്രഗ്രഥിക്കുന്നു

ശേഖരിച്ച വിവരങ്ങളെ അപ്രഗ്രഥിച്ചാണ് നിഗമനങ്ങളിൽ എത്തിച്ചേരുന്നത്. വിഗമനങ്ങളില്‍ എത്തിച്ചേരുന്നതിന് മുമ്പായി ചില കാര്യങ്ങള്‍ ചെയ്യാനുണ്ട്.

വിവരങ്ങളെ തരംതിരിക്കണം.

ഉദാഹരണത്തിന് ഒരു പക്ഷി നിരീക്ഷകൻ തനിക്ക് ലഭിച്ച വിവരങ്ങളിൽ നിന്നും ദേശാടന പക്ഷികളെയും തദ്ദേശീയ പക്ഷികളെയും തരംതരിച്ചെഴുതുന്നു. ധാന്യങ്ങൾ തിന്നുന്നവ, പുഴുക്കളെ തിന്നുവ, ചത്ത ജീവികളെ തിന്നുവ എന്നിങ്ങനെ ആഹാരരീതിയനുസരിച്ചും, വലുത്, ഇടത്തരം, ചെറുത് എന്നിങ്ങനെ വലിപ്പമനുസരിച്ചും പക്ഷികളെ തരംതിരിക്കാം.

തരംതിരിച്ച വിവരങ്ങളെ ക്രോഡീകരിക്കണം

അതായത് എത്രയിനം ദേശാടന പക്ഷികൾ കാണപ്പെടുന്നു. ധാന്യങ്ങൾ തിന്നുജീവിക്കുന്ന എത്ര പക്ഷികൾ ഉണ്ട് എന്നിങ്ങനെ. ഈ വിവരങ്ങളൊക്കെ പ്രത്യേകം പട്ടികകളായി തയ്യാറാക്കിയാൽ മനസ്സിലാക്കാൻ എളുപ്പമാണ്. പട്ടികകൾ ഉപയോഗിച്ച് ആവശ്യമെങ്കിൽ കണക്ക് കൂട്ടലുകൾ നടത്തണം.

അപഗ്രഥിക്കപ്പെട്ട വിവരങ്ങളെ വ്യാഖ്യാനിക്കണം

ഉദാ- ദേശാടന പക്ഷികൾ ഇരപിടിയൻമാരാണ്; ദേശാടന പക്ഷികൾ വൃക്ഷങ്ങളിലാണ് കൂടുകൂട്ടുന്നത്; ചുറ്റുപാടും കാണപ്പെടുന്ന പക്ഷികളിൽ ഭൂരിപക്ഷവും തദ്ദേശീയരാണ് – എന്നിങ്ങനെ.

9. പരികല്പനയുടെ പരിശോധന (ടെസ്റ്റിംഗ്)

ലഭിച്ച വിവരങ്ങളുടെയും വ്യാഖ്യാനത്തിന്റെയും അടിസ്ഥാനത്തിൽ പരികല്പനയെ പരിശോധിക്കുന്നു. പരികല്പനയെ ശരിവക്കുന്നവയാണ് ലഭിച്ച വിരങ്ങൾ എങ്കിൽ പരികല്പന സ്വീകരിക്കപ്പെടുന്നു, അല്ലങ്കിൽ തള്ളിക്കളയുന്നു.

10. തീരുമാനത്തിൽ/നിഗമനത്തിൽ എത്തിച്ചേരൽ

പ്രോജക്ട് പ്രവർത്തനത്തിന്റെ പരിസമാപ്തിയാണ് തീരുമാനമെടുക്കൽ. പരികല്പനയെ പറ്റിയുള്ള തീർപ്പ് കല്പിക്കുന്നത് ഈ ഘട്ടത്തിലാണ്. പരികല്പന സ്വീകരിക്കുകയോ തള്ളപ്പെടുകയോ ചെയ്യാം. പുതിയ കണ്ടെത്തലുകളുടെ അടിസ്ഥാനത്തിൽ പുതിയ പരികല്പനകൾ രൂപപ്പെടുകയോ, നിലവിലെ സിദ്ധാന്തങ്ങൾ പരിഷ്കരിക്കപ്പെടുകയോ ചെയ്യാം.

പ്രോജക്ട് റിപ്പോർട്ട് തയ്യാറാക്കലും പ്രസിദ്ധീകരിക്കലും.

ലഭിച്ച വിവരങ്ങളും അതിന്റെ അപ്രഗ്രഥനവും വിശകലനവും നിഗമനങ്ങളുമൊക്കെ മറ്റുള്ളവർക്ക് മനസ്സിലാകത്തക്ക വിധത്തിൽ ക്രമപ്പെടുത്തി തയ്യാറാക്കുന്ന എഴുത്ത് രൂപമാണ് പ്രോജക്ട് റിപ്പോർട്ട്. ഇതിന് നിയതമായ ഒരു ഘടനയുണ്ട്. ഒരു പ്രോജക്ട് റിപ്പോർട്ടിൽ അവശ്യം ഉണ്ടായിരിക്കേണ്ട ഉള്ളടക്കം ഇപ്രകാരമാണ്

ശീർഷകം

എന്താണ് റിപ്പോർട്ട് പ്രതിപാതിക്കുന്നത് എന്ന് വിവരിക്കുന്ന ഒരു ശീർഷകം (തലക്കെട്ട്) എല്ലാ പ്രോജക്ട് റിപ്പോർട്ടിന്റെയും ഭാഗമാണ്. ഇത് ലളിതമായിരിക്കുകയും അതേസമയം പരിശോധനാ ഘടകങ്ങൾ തമ്മിലുള്ള ബന്ധം പ്രതിപാതിക്കുകയും വേണം. എന്നൽ ഇത് പരമാവഴി 15 വാക്കുകൾക്കുള്ളിലായിരിക്കുന്നതാണ് ഉചിതം. ശീർഷകത്തോടൊപ്പം ഗവേഷകന്റെ പേരും സ്ഥാപനത്തിന്റെ പേരും തീർച്ചയായും ഉണ്ടായിരിക്കണം.

സംഗ്രഹം

പ്രൊജക്ടിനെ സംബന്ധിച്ച ഒരു ലഘു വിവരണമാണ് സംഗ്രഹം. ഇത് ലളിതമായ ഭാഷയിലുള്ളതും വായനാ താല്പര്യം വളർത്തുന്നതും ആയിരിക്കണം. പരമാവധി 120 വാക്കുകൾ മതിയാകും. അന്വേഷണ വിധേയമായ പ്രശ്നം, അന്വേഷണത്തിന് ഉപയോഗിച്ച രീതി, സാമ്പിളിന്റെ വിവരങ്ങൾ, വിവരശേഖരണത്തിന് ഉപയോഗിച്ച ഉപാധികൾ, പഠനഫലം, നിഗമനം എന്നിവയെല്ലാം പരാമർശിച്ചിരിക്കണം.

സംഗ്രഹം വായിച്ചശേഷം മുഴുവൽ റിപ്പോർട്ട് വായിക്കണോ എന്ന് വായനക്കാരൻ തീരുമാനിക്കുന്നു.

ആമുഖം

പഠന വിധേയമായ പ്രശ്നം ഉത്ഭവിക്കാനുണ്ടായ പശ്ചാത്തലം, പ്രശ്നത്തിന്റെ പ്രസക്തി മുതലായവ ആമുഖത്തിൽ പരാർശിക്കുന്നു. ഒരു നല്ല ആമുഖത്തിൽ താഴെ പറയുന്ന ഘടകങ്ങൾ ഉണ്ടായിരിക്കും.

  • പ്രൊജക്ടിന്റെ ആവശ്യകത.
  • ഇതുമായി ബന്ധപ്പെട്ട മുന്നറിവുകൾ
  • അന്വേഷണത്തിന്റെ വിവിധ ഘട്ടങ്ങൾ, അവ പഠിക്കുന്നതിനു് തെരഞ്ഞെടുത്ത രീതിശാസ്ത്രം എന്നിവയുടെ യുക്തി.

ഉദ്ദേശ്യങ്ങൾ

പരികല്പന, പ്രോജക്ടിന്റെ ലക്ഷ്യം എന്നിവ ഈ ഭാഗത്ത് ലഘുവായി വിവരിക്കാം.

മുന്നറിവുകളുടെ/മുന്‍ പഠനങ്ങളുടെ പരിശോധന

നമുക്ക് അനുഭവപ്പെട്ട പ്രശ്നം, നമ്മള്‍ രൂപപ്പെടുത്തിയ പരികല്പന എന്നിവയുടെ അടിസ്ഥനത്തിൽ ഇവ സംബന്ധിച്ച ലഭ്യമായ മുന്നറിവുകളും മുൻ പഠനങ്ങളും വിവരിക്കുന്നു.

പഠനരീതി

പഠനത്തിനായി തെരഞ്ഞെടുത്തത് എന്തൊക്കെ/ ആരെയൊക്കെ, വിവരശേഖരണത്തിനായി ഉപയോഗിച്ച ഉപാധികൾ (ഉദാ ഫോമുകൾ, ചോദ്യാവലി മുതലായവ-അവ സൂചിപ്പിച്ചാൽമതി, പൂർണരൂപം അനുബന്ധമായി പിന്നാലെ ചേർക്കുന്നതാണ് നല്ലത്.), സ്വീകരിച്ച മാർഗങ്ങൾ, അന്വേഷണ നടപടിക്രമങ്ങളുടെ ക്രമാനുഗത വിവരണം, അന്വേഷണ പദ്ധതി എന്നിവ വിവരിക്കുന്നു.

ശേഖരിച്ച വിവരങ്ങളുടെ ക്രോഡീകരണം, അപ്രഗ്രഥനം

ലഭിച്ചവിവരങ്ങളെ തരംതിരിച്ച് ക്രോഢീകരിച്ച് പട്ടികകളാക്കി അവതരിപ്പിക്കാന്‍ സാധിക്കുമെങ്കില്‍ അപ്രകാരം രേഖപ്പെടുത്തണം. വിവരണ രീതി പരമാവധി ഒഴിവാക്കുക. ഗ്രാഫുകളാക്കി ചിത്രീകരിക്കുുന്നതും നല്ലതുതന്നെ. ഇവ എല്ലാം തന്നെ പൂര്‍ണ രൂപത്തിലായിരിക്കണം. മതിയായ തലക്കെട്ടുകളും വരി, നിര എന്നിവയുടെ തലക്കെട്ടും ഉണ്ടായിരിക്കണം. നിഗമനങ്ങള്‍ ചുരുക്കി അവതരിപ്പിക്കണം. പഠനത്തിലൂടെ എന്താണ് കണ്ടെത്താന്‍ കഴി‍ഞ്ഞത്, ഈ കണ്ടെത്തല്‍ എങ്ങനെ വിശദീകരിക്കാം, ഇതിന് പരികല്പനയുമായുള്ള ബന്ധം എന്നിവയൊക്കെ പ്രതിപാദിക്കേണ്ടി വരും.

ഉപസംഹാരം, നിഗമനം.

നമ്മുടെ പഠനഫലങ്ങളെ ചുരുക്കി പ്രതിപാതിക്കുകയും പഠനഫലത്തില്‍ നിന്നും എത്തിച്ചേര്‍ന്ന നിഗമനം പ്രസ്താവിക്കുകയും ചെയ്യുക. പ്രധാനമായും ശ്രദ്ധിക്കേണ്ട സംഗതികള്‍-

  • പഠനത്തില്‍ നിന്നും മനസ്സിലാക്കിയത് എന്ത്? ഈ പഠനഫലം എന്തിനെ സൂചിപ്പിക്കുന്നു?
  • ഇനിയും മനസ്സിലാക്കാനുള്ള കാര്യങ്ങള്‍ എന്തെല്ലാം? ഭാവി പഠനത്തിന്റെ ദിശ എന്തായിരിക്കും?
  • ഈ പഠനത്തില്‍ വന്നു ചേര്‍ന്നിട്ടുള്ള പരിമിതികള്‍ എന്തെല്ലാം?
  • ഈ പഠനത്തില്‍ നിന്നും ലഭിച്ച നേട്ടം, പുതിയ കണ്ടെത്തലുകള്‍, പുതിയ വിവരങ്ങള്‍, പ്രായോഗിക തലത്തിലുള്ള കണ്ടെത്തലുകള്‍ എന്തെല്ലാം?
  • എന്തെങ്കിലും നിര്‍ദ്ദേശങ്ങള്‍ വയ്ക്കാനുണ്ടോ?

അവലംബം, അനുബന്ധം

വിവരങ്ങൾ ഏതൊക്കെ പുസ്തകത്തിൽ നിന്ന്/വെബ്സൈറ്റിൽ നിന്ന് കിട്ടി? അവയുടെ പേര്, രചയിതാവിന്റെ പേര്, പ്രസിദ്ധീകരിച്ചത് ആര്? പ്രസിദ്ധീകരിച്ച വര്‍ഷം. വെബ്‍സൈറ്റാണെങ്കില്‍ ഇവയോടൊപ്പം പൂര്‍ണമായ വെബ് അഡ്രസ്സും നല്‍കണം. ചിത്രങ്ങൾ, ചോദ്യാവലി, സർവ്വേ ഫോറങ്ങൾ മുതലായവ അനുബന്ധമായി നല്‍കണം.

റിപ്പോര്‍ട്ടിന്റെ ഘടന

പൊതുവേ പ്രൊജക്ട് റിപ്പോര്‍ട്ടിനെ പ്രാഥമിക ഭാഗം, പ്രധാന ഭാഗം എന്നിങ്ങനെ തരംതിരിക്കാം. അവയിൽ ഉള്‍പ്പെടുത്താവുന്ന ഉള്ളടക്കം ഇപ്രകാരമാണ്-

പ്രാഥമിക ഭാഗം

  1. ശീര്‍ഷകം
  2. നന്ദിപൂര്‍വ്വം (ആരെങ്കിലും ഉണ്ടങ്കില്‍)
  3. സാക്ഷ്യപത്രം
  4. ഉള്ളടക്കം,
  5. സംഗ്രഹം

മുഖ്യ ഭാഗം

1. ആമുഖം

  • അനുഭവപ്പെട്ട പ്രശ്നത്തിന്റെ പ്രസ്താവന
  • പ്രശ്നത്തിന്റെ സമകാലികവും ചരിത്രപരവുമായ പ്രാധാന്യം
  • ലക്ഷ്യം
  • പരികല്പന പ്രസ്താവിക്കല്‍
  • അനുമാനങ്ങള്‍
  • പരിമിതികള്‍
  • പ്രത്യേക പദങ്ങളുടെ നിര്‍വ്വചനം (ആവശ്യമെങ്കില്‍)

2. സമാന പ്രശ്നങ്ങളുടെ ലഭ്യമായ മുന്നറിവുകള്‍/ഗവേഷണങ്ങള്‍

വിവരണങ്ങള്‍, പട്ടികകള്‍, ചിത്രങ്ങള്‍, ഗ്രാഫുകള്‍, ചാര്‍ട്ടുകള്‍ എന്നിവയൊക്കെ ഉള്‍പ്പെടുത്താം.

3. പഠന രീതി

  • ഗവേഷണ രൂപരേഖയുടേയും രീതിശാത്രത്തിന്റെയും വിവരണം.
  • വിവരശേഖരണത്തിന്റെ ഉറവിടം.
  • സാമ്പിള്‍ നടപടിക്രമം
  • വിവരശേഖരണത്തിന്റെ ഉപാധികളും രീതിയും.
  • കണക്ക് കൂട്ടല്‍ രീതികള്‍

4. വിവരങ്ങളുടെ അപഗ്രഥനം

ഉള്‍പ്പെടുത്താവുന്നവ:

  • വിവരണം
  • പട്ടികകള്‍
  • ചിത്രങ്ങള്‍, ഗ്രാഫുകള്‍

5. ഉപസംഹാരം, നിഗമനം

  • പ്രശ്നം
  • ഗവേഷണ രീതി
  • പ്രധാന കണ്ടെത്തലുകള്‍ (പരികല്പന സ്വീകരിക്കാമോ, തള്ളിക്കളയാമോ)
  • നിഗമനം
  • തുടര്‍ പ്രവര്‍ത്തനങ്ങളുടെ സാധ്യത

6. അവലംബം

  • വിവരങ്ങള്‍ എവിടെനിന്നും ലഭിച്ചു, അവയുടെ സ്രോതസ്സ് മുതാലയവ

7. അനുബന്ധം

  • ചിത്രങ്ങൾ, ചോദ്യാവലി, സർവ്വേ ഫോറങ്ങൾ മുതലായവ


(ഇവ ഒരു നിര്‍ദ്ദേശം മാത്രമാണ്. ഉചിതമായ മറ്റു രീതികളും ഉപയോഗിക്കാവുന്നതാണ്)

ആളെക്കൊല്ലുന്ന വാക്സിൻ; പത്ത് വർഷത്തിൽ ആകെ മരണം 10612! നിങ്ങള്‍ ഞെട്ടിയോ?

വാക്സിനേഷന്‍ മൂലം പ്രതിദിനം 3 കുട്ടികള്‍ ഈ രാജ്യത്ത് മരിക്കുന്നുണ്ടോ?

ആളെക്കൊല്ലുന്ന വാക്സിൻ; പത്ത് വർഷത്തിൽ ആകെ മരണം 10612!

നാരദ ന്യൂസ് പോര്‍ട്ടലില്‍ മാര്‍ച്ച് 15ന് വന്ന വാര്‍ത്തയുടെ തലക്കെട്ടാണ്.[1] വാക്സിന്‍ നല്‍കിയ ശേഷം ഉടന്‍ ഉണ്ടായതും, വാക്സിന്റെ പ്രതിപ്രവര്‍ത്തനം മൂലവും ഉണ്ടായ മരണങ്ങളാണോ ഇത്? വാര്‍ത്തയില്‍ നിന്നും അങ്ങനെ വേണം മനസ്സിലാക്കാന്‍. 10 വര്‍ഷത്തില്‍ 10612 മരണം! ഒരു വര്‍ഷം 1061 മരണം. ഒരു മാസം ശരാശരി 88 മരണം. പ്രതിദിനം ഏകദേശം 3 മരണം. അതായത് ഇന്ത്യാ മഹാരാജ്യത്ത് വാക്സിന്‍ നല്‍കുന്നതിലൂടെ പ്രതിദിനം രണ്ടോ മൂന്നോ ശിശുമരണം നടക്കുന്നു.

ശിശുമരണങ്ങള്‍ സംബന്ധിച്ച ഈ കണക്കുകള്‍ എവിടെ നിന്നാണ് കിട്ടിയത്?

ന്യൂ ഡൽഹി സെന്റ് സ്റ്റീഫൻസ് ഹോസ്പിറ്റലിലെ പീഡിയാട്രിക്ക് വിഭാഗം തലവൻ ഡോക്ടർ ജേക്കബ് പുളിയേൽ, ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസിലെ ബയോസ്റ്റാറ്റിസ്റ്റിക്സ് പ്രൊഫസർ ഡോക്ടർ ശ്രീനിവാസ് എന്നിവർ ചേർന്ന് നടത്തിയ പഠനത്തെ പറ്റി പറഞ്ഞുകൊണ്ടാണ് വാര്‍ത്ത തുടങ്ങുന്നത്. എന്നാല്‍ ഇവരുടെ പഠന റിപ്പോര്‍ട്ടില്‍ നിന്നുല്ല മരണത്തെ സംബന്ധിച്ച ഈ എമണ്ടന്‍ കണക്കുകള്‍ നാരദ ഉദ്ധരിക്കുന്നത്. കണക്കുകള്‍ എവിടെ നിന്ന് കിട്ടി എന്ന് എവിടെയും പറയുന്നില്ല.

ഡോ. കെ.പി. അരവിന്ദന്റെ പ്രതികരണം

ഈ വാര്‍ത്തയെ പറ്റി പ്രതികരിച്ചുകൊണ്ട് ജനകീയാരോഗ്യ പ്രവര്‍ത്തകനായ ഡോ. കെ.പി. അരവിന്ദന്‍ ഫേസ്ബുക്കില്‍ ഇങ്ങനെ എഴുതി-[2]

ഈ കണക്ക് എവിടെ നിന്ന് കിട്ടി എന്നറിയില്ല. എ.ഇ.എഫ്.ഐ (AEFI – Adverse events following immunization) യുടെ കണക്കായിരിക്കണം. വാക്സിനേഷൻ കഴിഞ്ഞുള്ള ദിവസങ്ങളിൽ എന്തെങ്കിലും പ്രശ്നങ്ങൾ ഉണ്ടായിട്ടുണ്ടെങ്കിൽ അവ മുഴുവൻ പരിശോധിച്ച് ഏതെങ്കിലും പ്രശ്നം വാക്സീൻ മൂലമാണോ എന്ന് കണ്ടു പിടിക്കുന്നതിനുള്ള സംവിധാനമാണത്. വിവരാവകാശ നിയമ പ്രകാരം ആർക്കും ലഭിക്കുന്ന വിവരങ്ങളാണിത്.

വാക്സിനേഷന്‍ കഴിഞ്ഞുള്ള ദിവസങ്ങളിലെ എല്ലാ തരത്തിലുമുള്ള രോഗങ്ങളും മരണങ്ങളുമാണ് AEFI ആയി റിപ്പോർട്ട് ചെയ്യുന്നത്. ഇവയില്‍ ഏതെങ്കിലും രോഗമോ മരണമോ വാക്സിന്‍ മൂലം ഉണ്ടാകുന്നതാണോ എന്ന് പരിശോധിക്കുന്നു. ഗുരുതര രോഗങ്ങൾ, മരണങ്ങൾ എന്നിവയിൽ മിക്കവാറും എല്ലാത്തിനും വാക്സീൻ അല്ല മറ്റു കാരണങ്ങൾ ആണ് ഉള്ളത്. അതിനാലാണ് ഇതെല്ലാം സൂക്ഷ്മനിരീക്ഷണം നടത്തുന്ന യൂറോപ്പ്യൻ രാജ്യങ്ങളിലും അമേരിക്കയിലും ഒക്കെ വാക്സിനേഷൻ ഇന്നും നില നിന്നു പോകുന്നത്.

ഡോ. അരവിന്ദന്‍ ഇതിനെ ഇങ്ങനെ വിശദീകരിക്കുന്നു-

ഒരു വാക്സിനും കൊടുക്കാത്ത ഒരു പ്രദേശത്ത് ഒരു വർഷം ഒരു നിശ്ചിത പ്രായത്തിലുള്ള കുട്ടികളിൽ 3650 മരണങ്ങൾ ഉണ്ടാവും എന്ന് വിചാരിക്കുക. അതായത് വ്യത്യസ്തമായ കാരണങ്ങളാൽ ദിവസം 10 മരണങ്ങൾ വീതം. ഈ പ്രദേശത്ത് ഒരു പുതിയ വാക്സിൻ പരിപാടി തുടങ്ങി എന്ന് സങ്കൽപ്പിക്കുക. 100% കുട്ടികളും വാക്സീൻ എടുത്താൽ, ഏതു ദിവസം വാക്സിൻ കൊടുത്താലും AEFI കണക്കുകൾ പ്രകാരം വാക്സീൻ കഴിഞ്ഞുള്ള ഓരോ ദിവസവും 10 മരണങ്ങള്‍ നടക്കും. അതായത് വാക്സീൻ പരിപാടി ഉണ്ടെങ്കിലും ഇല്ലെങ്കിലും 3ദിവസങ്ങളില്‍ 30 മരണങ്ങൾ. വർഷത്തിൽ 3650 മരണങ്ങൾ. നാരദയിലെ ലേഖനെ പോലെയുള്ള വാക്സിന്‍ വിരുദ്ധര്‍ തികഞ്ഞ വിവരമില്ലായ്മ മൂലം ഈ 3650 മരണങ്ങളും വാക്സീൻ കൊണ്ടാണ് എന്നു പറയും!

ചില വാക്സിന്‍ വിരുദ്ധ ആക്ടിവിസ്റ്റുകളാണ് ഇത്തരം അബദ്ധങ്ങള്‍ പ്രചരിപ്പിക്കുകയും ഇത്തരം മാധ്യമപ്രവര്‍ത്തകര്‍ക്ക് എത്തിക്കുകയും ചെയ്യുന്നത്. പി.ജി ഹരിയെപ്പോലുള്ള ആക്ടിവിസ്റ്റുകൾ ഇതേ കാര്യം പല തവണ പറഞ്ഞു നടന്നിട്ടുള്ളതാണ്. അവർക്ക് വിവരമില്ലാത്തതു കൊണ്ടല്ല; കാരണം പല ചർച്ചകളിലും പലരും ഇക്കാര്യം ചൂണ്ടിക്കാണിച്ചിട്ടുള്ളതാണ്. ഈ ആക്ടിവിസ്റ്റുകൾ അറിഞ്ഞുകൊണ്ടു തന്നെ പച്ചക്കള്ളം പ്രചരിപ്പിക്കുകയാണ്.

നാരദ വാര്‍ത്തയിലെ മറ്റൊരു ഭാഗം നോക്കൂ …

കേരളത്തിൽ വാക്സിൻ കുത്തിവെപ്പെടുത്ത അതേ ദിവസം, 2011 ഡിസംബർ 14 ന് ആൻസി എന്ന കുട്ടി മരണപ്പെട്ടു. തിരുവനന്തപുരത്തെ വിതുര പ്രാഥമികാരോഗ്യ കേന്ദ്രത്തിലായിരുന്നു മരണം. വാക്സിൻ നൽകിയതിനെത്തുടർന്ന് കുട്ടിക്ക് പനി ബാധിക്കുകയും തുടർന്ന് മരണപ്പെടുകയുമായിരുന്നു. 2015 ഡിസംബർ മൂന്നിന് വാക്സിൻ നൽകിയതിനെത്തുടർന്ന് കർണാടകയിൽ ഇരട്ടക്കുട്ടികൾ മരിച്ചതും വാർത്തയായിരുന്നു. ഈ മരണങ്ങളെല്ലാം ചൂണ്ടിക്കാട്ടുന്നത് പെന്റാവലന്റ് വാക്സിന്റെ ദോഷവശങ്ങളാണ്.

അതായത് 2011ന് ശേഷം ഏഴില്‍പരം വര്‍ഷങ്ങളില്‍ വാക്സിന്‍ മൂലം മരണപ്പെട്ടു എന്ന് ആരോപിക്കുന്നതിന് ഇവര്‍ക്ക് ആകെ മൂന്ന് സംഭവങ്ങള്‍ മാത്രമാണ് ഉദ്ധരിക്കാനുള്ളത്. ഇതില്‍ വിതുരയിലെ കുട്ടി പനിമൂലമാണ് മരിച്ചത്. പനിക്ക് കാരണം വാക്സിനാണ് എന്നതിന് തെളിവൊന്നും ഇല്ല. വാക്സിന്‍ നല്‍കി മൂന്ന് ദിവസങ്ങള്‍ക്കുള്ളില്‍ നടക്കുന്ന എല്ലാ മരണവും വാക്സിന്‍ മൂലം ഉണ്ടാകുന്നതാണെന്നാണ് നാരദ കരുതുന്നത്.

കഴിഞ്ഞ അഞ്ച് വര്‍ഷം ഭാരതത്തില്‍ മരിച്ചത് 50 ലക്ഷം ആളുകളാണ്[3]. ഇവരില്‍ എല്ലാവരുംതന്നെ, മരണത്തിന് 72 മണിക്കൂര്‍ മുമ്പ് വെള്ളം കുടിച്ചവരാണ്. അതുകൊണ്ട് വെള്ളം കുടിച്ച 50 ലക്ഷം ആളുകളാണ് ഭാരതത്തില്‍ കഴിഞ്ഞ 5 വര്‍ഷമായി മരണപ്പെട്ടത് എന്ന് പറയാം. ഇതുതന്നെയാണ് വാക്സിന്‍ വിരുദ്ധരുടെ വാദവും.

“ഇയാൾക്കും (ലേഖകന്‍) ഈ പച്ചക്കള്ളം പ്രസിദ്ധീകരിച്ച പ്രസിദ്ധീകരണത്തിനും എതിരെ അപകീർത്തി കേസെടുക്കേണ്ടതാണ്.” ഡോക്ടര്‍ അരവിന്ദന്‍ എഴുതുന്നു.

പറഞ്ഞുവന്നത് ഇതാണ്, മുകളിലെ തലക്കെട്ട് വായിച്ച് നിങ്ങള്‍ ഞെട്ടുന്നുണ്ടങ്കില്‍ സൂക്ഷിച്ചോളൂ, നിങ്ങളെ ആര്‍ക്കും പറഞ്ഞ് പറ്റിക്കാന്‍ എളുപ്പമാണ്. അട്, മാഞ്ചിയം, തേക്ക് പോലെയുള്ള തട്ടിപ്പുകളില്‍ വളരെ പെട്ടന്ന് ഇരയാകുന്നവരില്‍ ഒരാളാണ് നിങ്ങള്‍. ജാഗ്രതൈ.


അവലംബം

  1. ആളെക്കൊല്ലുന്ന വാക്സിൻ; പത്ത് വർഷത്തിൽ ആകെ മരണം 10612! – നാരദ വാര്‍ത്ത. 2018 മാര്‍ച്ച് 15.
  2. ഡോ. കെ.പി. അരവിന്ദന്റെ ഫേസ്ബുക്ക് പോസ്റ്റ്, 2018 മാര്‍ച്ച് 17.
  3. India – Crude death rate, , knoema.

ജീന്‍വാല്‍ജീനും ഉപ്പ് തിന്ന കൂട്ടുകാരനും പിന്നെ ജനകീയ ഭക്ഷണശാലയും …

കയ്യില്‍ പണമില്ലങ്കിലും വിശക്കുന്നവന്റെ വയര്‍ നിറയ്ക്കുന്നൊരു ഹോട്ടല്‍ കേരളത്തില്‍ തുറന്നിരിക്കുകയാണ്. ദേശീയ പാതയോരത്ത് ആലപ്പുഴ-ചേര്‍ത്തല റൂട്ടില്‍ പാതിരപ്പള്ളിക്കു സമീപമാണ് ഈ ജനകീയ ഭക്ഷണശാല ഒരുക്കിയിരിക്കുന്നത്. വിശക്കുന്നവർക്ക് ഇവിടെ വന്നാൽ ഊണു ലഭിക്കും. കൈകഴുകി മടങ്ങുമ്പോള്‍ ബില്ലോ കാഷ്യറോ നിങ്ങളെ കാത്തിരിപ്പുണ്ടാവില്ല. ഓരോരുത്തരുടെയും മനസ്സാക്ഷിയാണ് ഇവിടുത്തെ കാഷ്യര്‍.

Janakeeya Bhakshanasala Front view
ജനകീയ ഭക്ഷണശാല, ആലപ്പുഴ

വിശപ്പ് എന്ന വാക്ക് കേള്‍ക്കുമ്പോള്‍ ലോകമാകെ ഓര്‍മ്മിക്കപ്പെടുന്ന പേര് ജീന്‍വാല്‍ ജീനിന്റേതായിരിക്കും. (ഷോങ്വെല്‍ ഷ്യോന്‍ എന്ന് ഫ്രഞ്ച് ഉച്ഛാരണം) സഹോദരിയുടെ മക്കളുടെ വിശപ്പടക്കാൻ ഭക്ഷണം മോഷ്ടിച്ചതിനു തടവിലാവുകയും പിന്നീട് മാനസാന്തരപ്പെട്ട് മറ്റൊരു ജീവിതം നയിക്കുകയും ഒരു നഗരത്തിന്റെ പിതാവും പരിവര്‍ത്തകനും ഫാക്ടറി ഉടമയും സര്‍വ്വോപരി മനുഷ്യ സ്നേഹത്തിന്റെ മകുടോദാഹരണവും ആയിത്തീര്‍ന്ന, ഒടുവില്‍ പ്രിയപ്പെട്ടവര്‍ക്ക് വേണ്ടി ജീവത്യാഗം ചെയ്ത ജീന്‍ വാല്‍ ജീന്‍.

Les-Miserables-1935

വിശപ്പ് എന്ന് കേള്‍ക്കുമ്പോള്‍ എന്റെ മനസ്സിനെ വേട്ടയാടുന്ന ഒരു ബാല്യകാല ചിത്രമുണ്ട്. വിശപ്പ് സഹിക്കാതെ ഉച്ചനേരത്ത് ഉപ്പ് കട്ട് തിന്നിരുന്ന കൂട്ടുകാരന്റേതാണ്.

ഞാന്‍ പഠിച്ച മണ്‍റോതുരുത്ത് ശങ്കുരുത്തില്‍ വി.എസ്.യു.പി. സ്കൂളിലെ സഹപാഠിയും എന്റെ അയല്‍ക്കാരനുമായിരുന്ന ശിവ (അവനെ അങ്ങനെ വിളിക്കാം). ഒരു ദിവസം സ്കൂളിനടുത്തുള്ള കുറ്റിക്കാട്ടില്‍ മറഞ്ഞിരുന്ന് കയ്യിലെ ചെറിയ പൊതിയില്‍ നിന്നും എന്തോ ഒളിച്ചുകഴിക്കുന്ന ശിവയെ ഞാന്‍ കണ്ടുപിടിച്ചു. നാരങ്ങാ മിഠായിയോ, ഉപ്പിലിട്ട മാങ്ങയോ, ചാമ്പങ്ങയോ മറ്റോ ആകും എന്നാണ് ഞാന്‍ കരുതിയത്. കൂട്ടൂകാര്‍ക്ക് കൊടുക്കാതെ ഒറ്റയ്ക്ക് കഴിക്കാനുള്ള സൂത്രം. എത്ര നിര്‍ബന്ധിച്ചിട്ടും പൊതിയിലെന്താണെന്ന് അവന്‍ പറഞ്ഞില്ല. ഒടുവില്‍ എന്റെ നിര്‍ബന്ധത്തിനു മുന്നില്‍ അവന്‍ പൊതിയഴിച്ചപ്പോള്‍ ഞാന്‍ ഞെട്ടി. ഒരു പൊതി കല്ലുപ്പ് … അവന്‍ കല്ലുപ്പ് തിന്നുകയാണ്!

അന്നൊക്കെ ആളുകള്‍ പണം കൊടുത്ത് ഉപ്പ് വാങ്ങാറില്ലായിരുന്നു. എല്ലാ പലവ്യഞ്ജന കടകളുടേയും മുന്നില്‍ ഒരു മരപ്പെട്ടിയില്‍ പരലുപ്പ് വച്ചിരിക്കും. സാധനം വാങ്ങുന്നവര്‍ക്ക് ആവശ്യമുള്ള ഉപ്പ് സൗജന്യമായി എടുക്കാം. ഈ മരപ്പെട്ടി പൂട്ടി വയ്ക്കാറില്ല, ശിവ അവിടെ നിന്നും ഉപ്പ് മോഷ്ടിച്ചു കൊണ്ടുവന്ന് തിന്നുകയാണ്. (അന്ന് യു.പി. സ്കൂളുകളില്‍ ഉച്ചഭക്ഷണ പരിപാടി ഉണ്ടിയിരുന്നില്ല.)

“ഉച്ചയാകുമ്പോള്‍ വയറ് കത്തും. ഉപ്പ് തിന്ന് കുറച്ച് പൈപ്പ് വെള്ളവും കുടിച്ചാല്‍ നല്ല ആശ്വാസം കിട്ടും. നീ തിന്നു നോക്കിയേ…”

അവന്‍ ഒരു പിടി ഉപ്പ് എന്റെ കയ്യില്‍ വച്ചു തന്നു. ഞാനത് വായിലിട്ട് അപ്പോള്‍ തന്നെ തുപ്പിക്കളഞ്ഞു.

നീറുന്ന ഒരോര്‍മ്മയാണ് ആ കൂട്ടുകാരന്‍ ….

ആലപ്പുഴയിലെ ജനകീയ ഭക്ഷണശാല – ഒരു അതുല്യമാതൃക

Hungry child

ഡോ. തോമസ് ഐസക് ഫേസ്ബുക്കില്‍ കുറിച്ചു: ‘വിശപ്പ് ഒരു വികാരമാണ്’. ഒരു പക്ഷേ, മറ്റെല്ലാത്തിനും മേല്‍ സ്ഥായിയായ വികാരം. അതിനുമുന്നില്‍ നമ്മള്‍ ശരിതെറ്റുകളും വിവേകവും ഒക്കെ നഷ്ടപ്പെടുത്തിയെന്ന് വരും. ഒരു മുഴു ഭ്രാന്തന്‍ പോലും വിശപ്പെന്ന വികാരം തിരിച്ചറിയും.

കയ്യില്‍ പണമില്ലങ്കിലും വിശക്കുന്നവന്റെ വയര്‍ നിറയ്ക്കുന്നൊരു ഹോട്ടല്‍ കേരളത്തില്‍ തുറന്നിരിക്കുകയാണ്. ദേശീയ പാതയോരത്ത് ആലപ്പുഴ-ചേര്‍ത്തല റൂട്ടില്‍ പാതിരപ്പള്ളിക്കു സമീപമാണ് ഈ ജനകീയ ഭക്ഷണശാല ഒരുക്കിയിരിക്കുന്നത്. വിശക്കുന്നവർക്ക് ഇവിടെ വന്നാൽ ഊണു ലഭിക്കും. കൈകഴുകി മടങ്ങുമ്പോള്‍ ബില്ലോ കാഷ്യറോ നിങ്ങളെ കാത്തിരിപ്പുണ്ടാവില്ല. ഓരോരുത്തരുടെയും മനസ്സാക്ഷിയാണ് ഇവിടുത്തെ കാഷ്യര്‍. കൗണ്ടറില്‍ ഒരു ബോക്സ് ഉണ്ടാവും. ഉള്ളറിഞ്ഞ് ഇഷ്ടമുള്ളത് ഇടാം. ഒന്നും ഇടാന്‍ വകയില്ലാത്തവര്‍ക്കും നിറഞ്ഞ സംതൃപ്തിയോടെ സന്തോഷത്തോടെ മടങ്ങാം. ഈ നിലയിലാവും ഭക്ഷണശാല പ്രവര്‍ത്തിക്കുക. ഓരോരുത്തർക്കും അവരുടെ ആവശ്യത്തിന് കഴിക്കുക, ഓരോരുത്തരും അവരുടെ കഴിവ് അനുസരിച്ച് നൽകുക എന്നതാണ് ആദര്‍ശം. ഇനി ഇങ്ങനെ ലഭിക്കുന്ന പണം മിച്ചമുണ്ടെങ്കില്‍, അത് ചുറ്റുമുള്ള പഞ്ചായത്തുകളിലെ അശരണര്‍ക്ക് ഭക്ഷണം നല്‍കുന്നതിനായി ഉപയോഗിക്കും.

Janakeeya Bhakshanasala Dining Hall
ഭക്ഷണഹാള്‍

ആലപ്പുഴയിലെ സന്നദ്ധ സംഘമായ സ്നേഹജാലകമാണ്  ജനകീയ ഭക്ഷണശാല ഒരുക്കിയിരിക്കുന്നത്. മാർച്ച് 3 ശനിയാഴ്ച ഉച്ചയ്ക്ക് 12.30 ന് ഭക്ഷണശാല തുറന്നു. ഈ ആശയത്തെ പിന്‍തുണയ്ക്കുന്നവര്‍ ഒരുമിച്ചിരുന്ന് ഭക്ഷണം കഴിച്ചുകൊണ്ടാണ് ഭക്ഷണശാലയുടെ ഉദ്ഘാടനവും സംഘടിപ്പിച്ചത്. സംസ്ഥാനത്തിന്റെ വിവിധ ഭാഗങ്ങളിൽനിന്ന് കലാസാംസ്കാരികരംഗത്തെ പ്രമുഖരും സാന്ത്വന പ്രവർത്തകരും പങ്കാളികളായി.

This slideshow requires JavaScript.

2000- ലധികം ആളുകള്‍ക്ക് ഒരേസമയം ഭക്ഷണം പാകംചെയ്യാന്‍ കഴിയുന്ന ആധുനിക സജ്ജീകരണങ്ങളോടുകൂടിയ സ്റ്റീം കിച്ചണ്‍ സംവിധാനം പതിനൊന്നേകാല്‍ ലക്ഷംരൂപ മുടക്കിയാണ് സ്ഥാപിച്ചിരിക്കുന്നത്. ഐ ആര്‍ ടി സി യുടെ സഹായത്തോടെ ഏറ്റവും കുറ്റമറ്റ രീതിയിലുള്ള മാലിന്യ സംസ്ക്കരണ സംവിധാനവും ഏറ്റവും ആധുനികമായ വാട്ടര്‍ ട്രീറ്റ്മെന്‍റ് പ്ലാന്‍റും 6 ലക്ഷം രൂപ ചെലവില്‍ ഒരുക്കിയിട്ടുണ്ട്. രണ്ടുനിലകളുള്ള ഭക്ഷണശാലയില്‍ താഴെ സ്റ്റീം കിച്ചണും മുകളില്‍ ഭക്ഷണം കഴിക്കുന്നതിനുള്ള സൗകര്യവും, ഭക്ഷണം മുകളില്‍ എത്തിക്കാന്‍ ലിഫ്റ്റ് സംവിധാനവുമുണ്ട്. കെഎസ്എഫ്ഇയുടെ സിഎസ്ആർ ഫണ്ടിൽ നിന്നാണ് ഈ സജ്ജീകരണങ്ങൾക്കുള്ള പണം കണ്ടെത്തിയത്.

അടുക്കള

ഭക്ഷണശാലയുടെ ചുവരുകളിൽ പാതിരപ്പള്ളി ഹാര്‍മണി ആര്‍ട്ട് ഗ്രൂപ്പിലെ ചിത്രകാരന്മാര്‍ വരച്ച രേഖാചിത്രങ്ങളാണ്. സ്നേഹജാലകം പ്രവര്‍ത്തകന്‍ കൂടിയായ സവിന്‍ചന്ദ്രയാണ് ഭക്ഷണശാലയുടെ രൂപകല്പനയും നിര്‍മ്മാണമേല്‍നോട്ടവും നിര്‍വ്വഹിച്ചിട്ടുള്ളത്.

സ്നേഹജാലകം പ്രവര്‍ത്തകന്‍കൂടിയായ എ. രാജു, വെളിയില്‍ ആണ് ഭക്ഷണശാല നിര്‍മ്മിക്കുന്നതിനായി ദേശീയപാതയോരത്ത് സ്ഥലം വിട്ടുനല്‍കിയത്. ഭക്ഷണശാലയോട് ചേര്‍ന്ന് സജീവന്‍ എന്നയാള്‍ തന്റെ രണ്ടരയേക്കര്‍ പുരയിടം ഭക്ഷണശാലയ്ക്കാവശ്യമായ പച്ചക്കറികള്‍ ഉല്പാദിപ്പിക്കുന്നതിനായി വിട്ടുനല്‍കി. ഇവിടെ ജൈവകൃഷിത്തോട്ടം ഒരുക്കിയിട്ടുണ്ട്. ഭക്ഷണം കഴിക്കാനെത്തുന്നവര്‍ക്ക് കൃഷിത്തോട്ടം സന്ദര്‍ശിക്കാനും പച്ചക്കറികള്‍ വാങ്ങാനും ഉള്ള സൗകര്യവുമുണ്ട്.

കൃഷിത്തോട്ടം

പ്രദേശത്തെ വീടുകളിലെ ആഘോഷങ്ങളിലും സ്മരണദിനങ്ങളിലും ഭക്ഷണം സ്പോണ്‍സര്‍ ചെയ്യുന്നതിനുള്ള സന്നദ്ധതാഫോറം പൂരിപ്പിച്ചുവാങ്ങി ആ പണം സമാഹരിച്ച് ഭക്ഷണശാലയുടെ ദൈനംദിന പ്രവര്‍ത്തനം മുന്നോട്ടുകൊണ്ടുപോകുവാന്‍ കഴിയുമെന്നാണ് ഇതിന്റെ സംഘാടകര്‍ പ്രതീക്ഷിക്കുന്നത്. ഇതിനകംതന്നെ സ്നേഹജാലകം പ്രദേശത്തെ 10 വാര്‍ഡുകളില്‍നിന്നായി ഇരുപത്തിരണ്ട് ലക്ഷത്തി എഴുപത്താറായിരം രൂപയ്ക്കുള്ള 1576 സന്നദ്ധതാഫോറം ഫെബ്രുവരി 4 ന് വാര്‍ഡുകളില്‍ ചെന്ന് നേരിട്ട് ഏറ്റുവാങ്ങിക്കഴിഞ്ഞു.

സ്നേഹജാലകം – ആലപ്പുഴയിലെ സാന്ത്വനപരിചരണ പദ്ധതി

സാന്ത്വന പരിചരണരംഗത്ത് ആലപ്പുഴയില്‍ നടന്നുവരുന്ന വേറിട്ട ജനകീയ ഇടപെടലുകൾക്ക് തുടക്കം കുറിച്ചത് സ്നേഹജാലകമാണ്. രോഗനിര്‍ണ്ണയരംഗത്തെ കഴുത്തറുപ്പന്‍ പ്രവണതകളെ പ്രതിരോധിക്കാന്‍ മൂന്നിലൊന്ന് ഫീസ് മാത്രം സ്വീകരിച്ചുകൊണ്ട് 4 വര്‍ഷംമുന്‍പ് ചെട്ടികാട് ആശുപത്രിക്ക് സമീപം സ്നേഹജാലകം ‘ജനകീയ ലബോറട്ടറി’ ആരംഭിച്ചു. ഇപ്പോൾ പി. കൃഷ്ണപിള്ള സ്മാരകട്രസ്റ്റിന്‍റെ നേതൃത്വത്തില്‍ മണ്ണഞ്ചേരിയിലും എസ്. ദാമോദരന്‍ ട്രസ്റ്റിന്‍റെ നേതൃത്വത്തില്‍ കോമളപുരത്തും ജനകീയ ലാബുകളുണ്ട്.

സ്നേഹജാലകം ഒരു വർഷത്തിനു മുമ്പാണ് വിശപ്പുരഹിത ഗ്രാമം പരിപാടിയ്ക്കു തുടക്കം കുറിച്ചത്. തുടർന്ന് പി കൃഷ്ണപിള്ള സ്മാരക ട്രസ്റ്റും കിടപ്പുരോഗികൾക്ക് വീടുകളിൽ ഭക്ഷണം എത്തിച്ചുകൊടുക്കാനുള്ള പ്രവർത്തനം ഏറ്റെടുത്തു. കഴിഞ്ഞ 3 മാസമായി മണ്ണഞ്ചേരി പി. കൃഷ്ണപിള്ള സ്മാരക ട്രസ്റ്റിന്‍റെ അടുക്കളയില്‍നിന്നും മാരാരിക്കുളം തെക്ക്, മുഹമ്മ, ആര്യാട്, മണ്ണഞ്ചേരി പഞ്ചായത്തുകളിലായി 400 കുടുംബങ്ങള്‍ക്ക് ഇപ്പോള്‍ ഭക്ഷണം എത്തിക്കുന്നുണ്ട്.

ജനകീയ ഭക്ഷണശാല ആരംഭിക്കുന്നതോടെ ആലപ്പുഴ പട്ടണത്തിലെയും മാരാരിക്കുളം തെക്ക്-വടക്ക് ഗ്രാമപഞ്ചായത്തുകളിലെയും ഭക്ഷണം കഴിക്കാന്‍ നിര്‍വ്വാഹമില്ലാത്ത 400 വീടുകളില്‍ ജനകീയ ഭക്ഷണശാലയില്‍നിന്ന് ആഹാരം എത്തിച്ചുനല്‍കാന്‍ കഴിയും. ആലപ്പുഴ മണ്ഡലത്തിലെ മുഴുവന്‍ അഗതികളായ പാലിയേറ്റീവ് രോഗികളും ഇതില്‍ ഉള്‍പ്പെടും. കേവലം ഭക്ഷണം കിടപ്പുരോഗികൾക്ക് എത്തിച്ചുകൊടുക്കുക മാത്രമല്ല, ഭക്ഷണം എത്തിച്ചുകൊടുക്കുന്നവർ മുഖേന രോഗവിവരങ്ങൾ മൊബൈൽ ആപ്പുവഴി ഡോക്ടർക്ക് എത്തിക്കുകയും അദ്ദേഹത്തിന്റെ നിർദ്ദേശങ്ങൾ പാലിയേറ്റീവ് സംഘടനയുടെ പ്രവർത്തകർ നടപ്പാക്കുകയും ചെയ്യും. ഭക്ഷണം എത്തിക്കുന്നത് സമഗ്ര സാന്ത്വനപരിചരണത്തിന്റെ ഭാഗമായിട്ടാണ്.

Dr T M Thomaas Isaac with organisers of Janakeeya Bhakshanasala
സ്നേഹജാലകം പ്രവര്‍ത്തകര്‍ ഡോ. ഐസകിനൊപ്പം.

അടുത്ത ദിവസങ്ങളിൽ ഇതുപോലുള്ള ഭക്ഷണശാലകൾ മാരാരിക്കുളത്ത് മറ്റു ചില കേന്ദ്രങ്ങളിലും ആലപ്പുഴ പട്ടണത്തിലും ആരംഭിക്കാനാവും. 2010ലെ ബജറ്റു മുതൽ വിശപ്പുരഹിത പദ്ധതി പലവട്ടം പ്രഖ്യാപിക്കപ്പെട്ടിട്ടുള്ളതാണ്. എന്നാൽ ഇതാദ്യമായി പ്രായോഗികതലത്തിൽ ആവിഷ്കരിക്കപ്പെടുന്നത് ആലപ്പുഴയിലാണ്. മണ്ഡലത്തിലെ എം.എല്‍.എ. കൂടിയായ ഡോ. തോമസ് ഐസക് ഈ പ്രവര്‍ത്തനങ്ങള്‍ക്ക് തണലായി കൂടെയുണ്ട്. ഈ മാതൃക കേരളമെമ്പാടും വ്യാപിപ്പിക്കുമെന്ന് 2018-19ലെ ബജറ്റിൽ ധനമന്ത്രി പ്രഖ്യാപിച്ചിട്ടുണ്ട്.

നന്മയുടെ വഴികള്‍ അടഞ്ഞിട്ടില്ല എന്ന് ആലപ്പുഴയിലെ സ്നേഹജാലകം പ്രവര്‍ത്തകര്‍ ലോകത്തിന് കാണിച്ചുതരുന്നു.

മാപ്പുതരല്ലേ നീ മധൂ…

 

ഒരിറ്റ് നീരിറങ്ങുന്നില്ല

ഉമിനീരു പൊടിയുന്നില്ല,

കണ്ണുനീര്‍ കിനിയുന്നില്ല,

കരച്ചിലെന്‍ കണ്ഠത്തില്‍ മരിച്ചുപോയ്….

നാടുകാണുവാന്‍ വന്ന പച്ചമനുഷ്യന്‍ നീ

നാട്ടുജീവിയുടെ ഭാഷയറിഞ്ഞില്ല

പറഞ്ഞുനോക്കി, പക്ഷേ ഫലിച്ചില്ല,

നിന്റെ ഭാഷയവര്‍ക്കുമറിയില്ല.

കൊന്നുകളഞ്ഞവര്‍, വിശന്നവന്‍ നിന്നെ.

കൊന്നുകളഞ്ഞവര്‍, കറുത്തവന്‍ നിന്നെ.

സ്വയം പകര്‍ത്തിയ മോന്തയും കാട്ടി

ചിരിച്ചു നിന്നവര്‍, ജയിച്ചു നിന്നവര്‍.

മാപ്പുതരല്ലേ നീ.. നീറി നീറി ഞാനെന്‍

കുറ്റബോധത്താല്‍ മരിക്കാതിരിക്കട്ടെ.

മാപ്പുതരല്ലേ നീ.. നീറി നീറി ഞാനെന്‍

കുറ്റബോധത്താല്‍ മരിക്കാതിരിക്കട്ടെ.

എന്‍. സാനു.

സൈന്‍ തീറ്റയും കോസ് തീറ്റയും ടാന്‍ തീറ്റയോട് പറഞ്ഞത്

സ്കൂള്‍ കാലംമുതല്‍ നമ്മെ ഏറ്റവും ബുദ്ധിമുട്ടിച്ച വിഷയം കണക്ക്. അതില്‍ തന്നെ ഇതുവരെ മനസ്സിലാകാഞ്ഞ സംഗതി Sin θ, Cos θ, Tan θ. എന്താണ് ഈ θ? ഇതുകൊണ്ട് ഇന്നുവരെ ജീവിതത്തില്‍ ആര്‍ക്കെങ്കിലും ഒരു ഗുണം ഉണ്ടായിട്ടുണ്ടോ? ഇതിന്റെ പേരില്‍ എത്രയെത്ര പീഡനങ്ങളാണ് നമ്മള്‍ അനുഭവിച്ചത്?

ഒരു വടക്കന്‍ സെല്‍ഫിഎന്ന സിനിമ കണ്ടവര്‍ക്ക്, എഞ്ചിനീയിംഗ് പരീക്ഷയുടെ തലേ ദിവസം നായകനും കൂട്ടുകാരും പരീക്ഷയ്ക്ക് തയ്യാറെടുക്കുന്ന രംഗം ഓര്‍മ്മയുണ്ടാകും. ഒരാള്‍ സംശയം ചോദിക്കുന്നു Sin2θ, Cos2θ ഒക്കെയാണ് സംഭാഷണ വിഷയം. അപ്പോള്‍ നായകന്‍ ചോദിക്കുന്ന ഒരു ചോദ്യമുണ്ട്

എനിക്ക് കുഞ്ഞുന്നാള്‍ മുതലുള്ള സംശയമാണ്, എന്താണീ തീറ്റ? ഞാന്‍ ആരോടും ചോദിച്ചിട്ടില്ലന്നേയുള്ളൂ…”

അതേ, നമുക്കും സംശയമാണ് എന്താണീ തീറ്റ?

ഈ സാധനം എത്രത്തോളം പാവമാണെന്ന് സ്കൂളും കോളേജും ഒക്കെ കഴിഞ്ഞാണ് ഞാന്‍ മനസ്സിലാക്കിയത്. എന്റെ അനുഭവം നിങ്ങള്‍ക്കായി പങ്കുവയ്ക്കാം എന്ന് കരുതുന്നു.

സൈന്‍ θ എന്നൊക്കെ കേട്ട് ബാക്കി നിര്‍ത്തി പോകല്ലേ. അങ്ങനെ വലിയ ഘഠാഘടിയന്‍ കാര്യങ്ങളൊന്നും പറയാന്‍ പോകുന്നില്ലന്നേ!

ഓലപ്പുരയും കഴുക്കോലും ഉത്തരവും

എന്റെ കുട്ടിക്കാലത്ത് ഞങ്ങളുടേത് ഓലപ്പുരയായിരുന്നു. ഓരോ വര്‍ഷവും പുരമേയുന്ന പരിപാടിയുണ്ട്. പഴയ ഓലമാറ്റി പുതിയ ഓല മേയും. അപ്പോള്‍ അധികം വരുന്ന പഴയ ഓലയും കമ്പുകളും ഉപപയോഗിച്ച് കളിവീടുകള്‍ ഉണ്ടാക്കും. കളിവീടിന്റെ പ്രധാന ഭാഗം അതിന്റെ മേല്‍ക്കൂരയാണ്. അത് ത്രികോണ ആകൃതിയിലാണുള്ളത്. തൂണുകളും മുകളിലേക്ക് തള്ളിനില്‍ക്കുന്ന നടുത്തൂണും ഭൂമിക്ക് സമാന്തരമായ ഉത്തരവും അതില്‍ ചരിച്ചു വയ്ക്കുന്ന കഴുക്കോലുമാണ് ഇതിന്റെ അടിസ്ഥാന ഘടകങ്ങള്‍.

Sin 1.png

ഉത്തരത്തിന്റെ പകുതിയും അതിനു മുകളിലുള്ള നടുത്തൂണിന്റെ ഭാഗവും ആ ഭാഗത്തുള്ള കഴുക്കോലും ചേരുമ്പോള്‍ ഒരു മട്ടത്രികോണമാകും.

Sin 2.png

ഒരെളുപ്പത്തിന് നമുക്ക് ഈ ത്രികോണത്തിന്റെ വശങ്ങളെ ചുവട്, പൊക്കം, ചാര് (ചാരി വച്ചിരിക്കുന്നത്) എന്ന് പേരിട്ട് വിളിക്കാം. ഉത്തരത്തിന്റെ പകുതിയാണ് ചുവട്. ഉത്തരത്തിന് മുകളിലേയ്ക്ക് നില്‍ക്കുന്ന തൂണിന്റെ ഭാഗമാണ് പൊക്കം. ചരിച്ച് വച്ചിരിക്കുന്ന കഴുക്കോലാണ് ചാര്. ചുവടിനും ചാരിനും ഇടയിലുള്ള കോണളവാണ് ചരിവ്.

ചാരിനാണ് ഏറ്റവും നീളക്കൂടുതല്‍. ചുവടും പൊക്കവും ചേര്‍ന്ന് ഒരു മട്ടകോണ്‍ ഉണ്ടാകുന്നു. ചരിവ് എത്രവ്യത്യാസപ്പെട്ടാലും മട്ടകോണിന് മാറ്റം വരില്ല. മട്ടകോണിന് എതിരെയാണ് ചാര്. ചരിവിനെ സൂചിപ്പിക്കുന്ന കോണിന് എതിരെയാണ് പൊക്കം.

Sin 4.png

ചാരിന്റെ നീളം വ്യത്യാസപ്പെടുന്നില്ല എന്ന് കരുതുക. ചരിവ് വ്യത്യാസപ്പെടുന്നതിന് അനുസരിച്ച് ചുവടും പൊക്കവും വ്യത്യാസപ്പെടും. ചരിവ് കൂടുന്നതിനനുസരിച്ച് പൊക്കം കൂടുകയും ചുവട് നീളം കുറഞ്ഞ് വരികയും ചെയ്യും.

Sin 5.png

മുകളിലെ ചിത്രം ശ്രദ്ധിച്ചാല്‍ നമുക്ക് മനസ്സിലാകുന്നവ ഇവയാണ്

  • ചരിവ് വളരെ കുറവാണെങ്കില്‍ പൊക്കവും വളരെ കുറവായിരിക്കും, അപ്പോള്‍ ചുവടിന്റെ നീളം ചാരിന്റെ നീളത്തിനോട് തുല്യമായിരിക്കും.
  • ചരിവ് പൂജ്യമാണെങ്കില്‍ പൊക്കം പൂജ്യം. ചാരും ചുവടും തുല്യം. കൂര ഉണ്ടാകില്ല.
  • ചരിവ് കൂട്ടി കൂട്ടി കൊണ്ടുവന്നാല്‍ പൊക്കവും കൂടിക്കൂടി വരും. ചുവട് നീളം കുറഞ്ഞ് കുറഞ്ഞ് വരും.
  • ചരിവ് പരമാവധി ആകുമ്പോള്‍ പൊക്കവും പരമാവധിയാകും. ചുവടിന് നീളം തീരെ ഇല്ലാതാകും.
  • ചരിവിന്റെ പരമാവധി 900 ആണല്ലോ. അപ്പോള്‍ ചാരും പൊക്കവും തുല്യമാകും, ചുവട് പൂജ്യമാകും. അപ്പോഴും കൂര ഉണ്ടാകില്ല.

താഴെ കൊടുത്തിരിക്കുന്ന ചലിതചിത്രീകരണം ശ്രദ്ധിച്ചാല്‍ ഇക്കാര്യങ്ങള്‍ എളുപ്പത്തില്‍ മനസ്സിലാകും.

 

ചരിവ് പകുതി (450) ആയാലോ, പൊക്കവും ചുവടും തുല്യനീളമാകും. അപ്പോള്‍ ഇതൊരു കളിപോലെയാണ്. ചാരിന്റെ ചരിവ് വ്യത്യാസപ്പെടുത്തി പൊക്കവും ചുവടും ക്രമീകരിക്കാം.

Sin 6
ചരിവ് 450 ആകുമ്പോള്‍ ചുവടിന്റെ നീളവും പോക്കവും സമമാകും.

വ്യത്യസ്ത ചരിവുകളില്‍ ചാരിന്റെ എത്രഭാഗം ആയിരിക്കും പൊക്കം എന്ന് നോക്കാം. ചരിവ് പൂജ്യം ആകുമ്പോള്‍ പൊക്കം പൂജ്യമാണെന്ന് പറഞ്ഞല്ലോ. ചരിവ് 300 ആണെങ്കിലോ? പൊക്കം ചാരിന്റെ പകുതിയായിരിക്കും. കൂരയുടെ വലിപ്പം എന്ത് തന്നെയായാലും ചരിവ് 300 ആണെങ്കില്‍ ചാരിന്റെ പകുതിയായിരിക്കും പൊക്കം .

Sin 7
ചരിവ് 300 ആകുമ്പോള്‍ ചാരിന്റെ പകുതിയായിരിക്കും പോക്കം.

ഈ അറിവ് വച്ച് പുര പണിയുമ്പോള്‍ പൊക്കത്തിന്റേയും കഴുക്കോലിന്റേയും അളവ് മുന്‍കൂട്ടി കാണക്കാക്കാം. 300 ചരിവില്‍ മേല്‍ക്കൂര പണിയുകയാണെന്ന് കരുതുക. കഴുക്കോലിന്റെ നീളം 10 മീറ്റര്‍ ആണെങ്കില്‍ പൊക്കം 5 മീറ്റര്‍ ആയിരിക്കും. അതനുസരിച്ച് തടി മുന്‍കൂട്ടി മുറിച്ചെടുക്കാം.

Sin 8
ചരിവ് 150 ആകുമ്പോള്‍ ചാരിന്റെ കാല്‍ഭാഗമായിരിക്കും പോക്കം.

ചരിവ് 150 ആണെങ്കിലോ, പൊക്കം ചാരിന്റെ കാല്‍ഭാഗം (1/4) ആയിരിക്കും*. അതായത് കഴുകക്കോല്‍ 10 മീ. എങ്കില്‍ പൊക്കം 2.5 മീറ്റര്‍.

പോലെ ചരിവ് 490 ആയാല്‍ പൊക്കം ചാരിന്റെ മുക്കാല്‍ ഭാഗം ആയിരിക്കും*. അതായത് കഴുക്കോല്‍ 10 മീറ്റര്‍ എങ്കില്‍ പൊക്കം 7.5 മീറ്റര്‍.

ഇതിനെ ഒരു പട്ടികയാക്കിയാലോ.

table-of-sine

ഇതിപ്പോ കുറച്ച് വെറുപ്പിക്കലായിപ്പോയി, ഇല്ലേ. സാരമില്ല, ഇനി കാര്യത്തിലേക്ക് വരാം.

എന്താണ് Sine?

ചാരിന്റെ എത്രഭാഗമാണോ പൊക്കം, അതിനെയാണ് Sine എന്ന് പറയുന്നത്.

  • കഴുക്കോല്‍ 4 മീറ്ററും പൊക്കം 2 മീറ്ററും ആകുമ്പോള്‍ കഴുക്കോലിന്റെ പകുതിയാണ് പൊക്കം. അതായത് Sine = 1/2.
  • കഴുക്കോല്‍ 3 മീറ്ററും പൊക്കം 1 മീറ്ററും ആയാല്‍ Sine 1/3.
  • കഴുക്കോല്‍ 8 മീറ്ററും പൊക്കം 2 മീറ്ററും ആയാല്‍ Sine 2/8 അഥവാ 1/4.
പൊക്കത്തിനെ ചാരുകൊണ്ട് ഹരിച്ചാല്‍ കിട്ടുന്ന വിലയാണ് Sine

formula sine

(Sine എന്നത് ചുരുക്കി Sin എന്ന് പറയുന്നു.)

അപ്പോള്‍ എന്താണ് θ?

ചുവടുമായി ചാരിനുള്ള ചരിവാണ് θ. അഥവാ ചരിവളവിനെ സൂചിപ്പിക്കാന്‍ ഉപയോഗിക്കുന്ന ചിഹ്നമാണ് θ.

എന്താണ് θ എന്ന് ചോദിച്ചാല്‍ ധൈര്യമായി പറയണം, കൂരയുടെ ചരിവാണതെന്ന്!

ചാരും ചരിവും അവിടെ നില്‍ക്കട്ടെ, സ്കൂളില്‍ ഇതൊന്നുമല്ലല്ലോ പഠിച്ചത്?

ശരി ഇനി നാം പഠിച്ചിട്ടുള്ള ത്രികോണമിതിയിലേക്ക് വരാം.

  • നമ്മളുടെ ചാര് മട്ടകോണിന് എതിരെയുള്ള വശമാണ്, ഏറ്റവും വലിയ വശമാണ്. അതിനെ കര്‍ണ്ണം എന്ന് പറയുന്നു.
  • ചരിവ് കണക്കാക്കുന്ന കോണിനെതിരെയാണ് പൊക്കം. അതിനാ‍ല്‍ പൊക്കത്തെ എതിര്‍ വശം എന്നോ, ലംബം എന്നോ പറയുന്നു.
  • ചുവട് ഇതേ കോണിനോട് ചേര്‍ന്നാണ്. അതിനാല്‍ ചുവടിനെ സമീപവശം എന്ന് പറയുന്നു.

Sin 9

അപ്പോള്‍ Sin θ = എതിര്‍വശം/കര്‍ണ്ണം

ചരിവ് പൂജ്യമാണെങ്കില്‍ എതിര്‍വശം പൂജ്യമാണെന്ന് കണ്ടല്ലോ. അതായത്-

ചരിവ് പൂജ്യം ആകുമ്പോള്‍ Sine = 0/കര്‍ണ്ണം = 0

കണക്കിന്റെ ഭാഷയില്‍ സിമ്പിളായി പറയും: Sin 0 = 0. ഇത്രേ ഉള്ളു കാര്യം.

അങ്ങനെയാണേല്‍ മുകളിലെ പട്ടികയെ താഴെ പറയുന്ന രീതിയില്‍ എഴുതാമല്ലോ-

  • Sin 0 = 0
  • Sin 15 = 1/4* അഥവാ 0.25 (കുറച്ചുകൂടി കൃത്യമായ വില 0.2588 ആണ്)
  • Sin 30 = 1/2 അല്ലങ്കില്‍ 0.50
  • Sin 49 = 3/4* അഥവാ 0.75 (കുറച്ചുകൂടി കൃത്യമായ വില 0.7547)
  • Sin 90 = 1

അപ്പോള്‍ പട്ടിക 1 ഇങ്ങനെ ലളിതമായി എഴുതാം.

Table 2
പട്ടിക 2

ഈ സൈനും കോസും കൊണ്ട് വല്ല പ്രയോജനവും ഉണ്ടോ?

കര്‍ണ്ണത്തിന്റെ അളവറിയാമെങ്കില്‍ വ്യത്യസ്ത കോണളവില്‍ മട്ടത്രികോണത്തിന്റെ എതിര്‍ വശത്തിന്റെ നീളം എത്രയാണെന്ന് കണ്ടുപിടിക്കാന്‍ ഇത് സഹായിക്കുമല്ലോ. അഥവാ എതിര്‍ വശത്തിന്റെ നീളം അറിയാമെങ്കില്‍ കര്‍ണ്ണത്തിന്റെ നീളം കണക്കാക്കാം.മുമ്പ് പഠിച്ച ഒരു ചോദ്യം ഓര്‍മ്മ വരുന്നു-

6 മീറ്റര്‍ പൊക്കമുള്ള ഒരു ഏണി ഒരു ഭിത്തിയില്‍ ചാരി വച്ചിരിക്കുന്നു. ഏണി തറയുമായി 300 കോണുണ്ടാക്കുന്നെങ്കില്‍ ഭിത്തിയുടെ ഉയരം എത്ര?

മുമ്പായിരുന്നെങ്കില്‍ ആ മാര്‍ക്ക് വേണ്ടന്നങ്ങ് തീരുമാനിച്ചേനെ. പക്ഷേ നമ്മള്‍ ഇത്രയും മഹാഭാരതമൊക്കെ വായിച്ചിട്ട് അങ്ങനെയങ്ങ് വിട്ടുകളയാന്‍ പാടില്ലല്ലോ. ഭിത്തി തറയില്‍ നിന്നും ലംബമായാണ് നില്‍ക്കുന്നത്. (ഭിത്ത് ശശി മേശിരി പണിതതല്ലന്ന് കരുതാം.) ഭിത്തി, തറ, ഏണി ഇവ ചേര്‍ന്ന് ഒരു മട്ടത്രികോണം ഉണ്ടാക്കുന്നു. ഏണിയും തറയും തമ്മിലുള്ള കോണിന് എതിരെയാണ് ഭിത്തി. കോണ് 30 ആയാല്‍ ഭിത്തിയുടെ പൊക്കം ചാരിവച്ചിരിക്കുന്ന ഏണിയുടെ പകുതി ആയിരിക്കും. ഏണി 6 മീറ്റര്‍. അതുകൊണ്ട് ഭിത്തി 3 മീറ്റര്‍. സംഭവം സിമ്പിളല്ലേ? ചാരിവച്ച ഏണിയുടെ അളവെടുക്കാന്‍ മാത്രമല്ല, ബ്രഹ്മാണ്ഡത്തിലെ ഘഠാഘടിയന്‍ അളവുകള്‍ വരെ നിസ്സാരമായി കണക്കാക്കാന്‍ ഈ സൂത്രം ഉപയോഗിക്കാം. എതിര്‍ വശത്തിന്റെ അളവറിയാന്‍ കര്‍ണ്ണത്തിന്റെ അളവിനെ സൈന്‍ മൂല്യം കൊണ്ട് ഗുണിച്ചാല്‍ മതി. ഉദാഹരണ്തിന് ഏണിയുടെ നീളം 8 മീറ്ററും അത് തറയുമായി ഉണ്ടാക്കുന്ന കോണ്‍ 49 യുമാണെന്നിരിക്കട്ടെ. ഭിത്തിയുടെ ഉയരം കാണാന്‍ ഏണിയുടെ നീളമായ 8 മീറ്ററിനെ Sin 49 ന്റെ വിലയായ 0.75 കൊണ്ട് ഗുണിച്ചാല്‍ മതി.

              8 X 0.75 = 6.

അതായത് ഭിത്തിയുടെ പൊക്കം 6 മീറ്റര്‍.

ഇങ്ങനെ 00 മുതല്‍ 900 വരെയുള്ള കോണളവുകളുടെ സൈന്‍ മൂല്യം കണക്കന്‍മാര്‍ കണ്ടെത്തി പട്ടികപ്പെടുത്തിയിട്ടുണ്ട്. ആ പട്ടിക നോക്കി ഏതിര്‍വശവും കര്‍ണ്ണവും കണ്ടെത്താമല്ലോ.

എന്താണ് Cos θ?

ചരിവ് വ്യത്യാസപ്പെടുന്നതിന് അനുസരിച്ച് ചുവടിന്റെ നീളവും വ്യത്യാസപ്പെടുമല്ലോ. ചാരിന്റെ(കര്‍ണ്ണത്തിന്റെ) എത്രഭാഗമാണ് ചുവട്(സമീപവശം) എന്നതിനെയാണ് Cosine എന്ന് പറയുന്നത്. (ചുരുക്കം Cos)

formula Cos

നേരത്തെ കണ്ടതുപോലെ ചരിവ് പൂജ്യം ആകുമ്പോള്‍ ചാരും ചുവടും തുല്യമായിരിക്കും. ചരിവ് 900 ആകുമ്പോള്‍ ചുവട് പൂജ്യമായിരിക്കും. അതായത് –

  • Cos 0 = 1.
  • Cos 90 = 0.

വിവധ ചരിവളവുകളില്‍ Cos ന്റെ വില താഴെ പട്ടികയില്‍ കൊടുത്തിരിക്കുന്നു.

Table of Cos
പട്ടിക 3

മനസ്സിലായി മനസ്സിലായി …. നിര്‍ത്തണമെന്നല്ലേ, ഒരു കാര്യം മാത്രം പറഞ്ഞ് നിര്‍ത്താം.

പൊക്കത്തിന്റെ എത്രഭാഗമാണ് ചുവട് എന്നതിന്റെ അളവാണ് ടാന്‍ജന്റ് അഥവാ Tan.

അപ്പോ സൈന്‍ തീറ്റയും കോസ് തീറ്റയും ടാന്‍ തീറ്റയോട് പറഞ്ഞതെന്താ?

ആ … ആര്‍ക്കറിയാം, അതൊക്കെ ഒരു പഞ്ച്കിട്ടാനായി വെറുതെ തലക്കെട്ട് കൊടുത്തതല്ലേ!

അപ്പോ നിവിന്‍ പോളീടെ ഫോട്ടോയിട്ടതോ?

അയാം ദ സോറി അളിയാ അയാം ദ സോറി …


*  മൂല്യങ്ങള്‍ മനസ്സിലാകാനായി ഏറ്റവും അടുത്ത ഭിന്നസംഖ്യകളായി എഴുതിയിരിക്കുകയാണ്. യഥാര്‍ത്ഥ മൂല്യം അല്പം കൂടി വ്യത്യാസപ്പെടും.


”എനിക്ക് കുഞ്ഞുന്നാള്‍ മുതലുള്ള സംശയമാണ്, എന്താണീ തീറ്റ” ?

2018 ഒക്ടോര്‍ 13 ലെ മാതൃഭൂമി വിദ്യയിലും ഇ-പേപ്പറിലും ഈ ലേഖനം പ്രസിദ്ധീകരിച്ചു

കല്ലിയൂരിലെ ദേശീയ വാഴ മഹോത്സവം

നൂറുകണക്കിന് വാഴപ്പഴങ്ങളുടെ വൈവിധ്യവുമായി വ്യത്യസ്തമായൊരു പ്രദര്‍ശനം തിരുവനന്തപുരം നഗരത്തോട് ചേര്‍ന്നുള്ള, വെള്ളായണി കായലിന്റെ തീര ഗ്രാമമായ കല്ലിയൂരില്‍ നടക്കുന്നു. ഫെബ്രുവരി 17 മുതല്‍ അഞ്ച് ദിവസം നടക്കുന്ന വാഴ മഹോത്സവത്തില്‍ കേരളത്തിലേയും മറ്റു സംസ്ഥാനങ്ങളിലേയും നിരവധി വാഴയിനങ്ങളോടൊപ്പം മറ്റുരാജ്യങ്ങളില്‍ നിന്നുള്ള വാഴയിനങ്ങളും സ്ഥാനം പിടിച്ചിട്ടുണ്ട്.

ചെംകദളി (കപ്പപ്പഴം)
ചെംകദളി (കപ്പപ്പഴം)

കത്ത് ഏറ്റവും അധികം വില്ക്കപ്പെടുന്ന പഴവര്‍ഗ്ഗങ്ങളില്‍ രണ്ടാം സ്ഥാനമാണ് വാഴപ്പഴത്തിനുള്ളത്. മനുഷ്യന്‍ കൃഷിക്കായി ഇണക്കിവളര്‍ത്തിയ കാട്ടുസസ്യങ്ങളില്‍ ഏറ്റവും പ്രാചീനമായ ഇനവും വാഴയാണ്. എത്രതരം വാഴപ്പഴങ്ങളുണ്ട്? ആയിരക്കണക്കിനെന്നാണ് ഉത്തരം.

മറ്റുസംസ്ഥാനങ്ങളെ അപേക്ഷിച്ച് വളരെയധികം വ്യത്യസ്തമായ വാഴപ്പഴങ്ങളുള്ള നാടാണ് കേരളം. ഓരോ പ്രദേശക്കാര്‍ക്കും വ്യത്യസ്തമായ വാഴപ്പഴങ്ങളോടാണ് പ്രിയം. ഉദാഹരണത്തിന് തിരുവനന്തപുരത്തുകാര്‍ക്ക് കപ്പപ്പഴം എന്ന് വിളിക്കുന്ന ചെങ്കദളിപ്പഴം ഏറെ പ്രിയപ്പെട്ടതാണ്. ആലപ്പുഴക്കാര്‍ക്ക് ഞാലിപ്പൂവന്‍ പഴത്തോടാണ് പ്രിയം.

Banana Thousand Piece Poovan
ആയിരംകാ പൂവന്‍
പച്ച, മഞ്ഞ, ഓറഞ്ച്, ചുവപ്പ് എന്നിങ്ങനെ നിറങ്ങള്‍ കൊണ്ടും ഒരു ചെറുവിരലിനേക്കാള്‍ ചെറുപ്പമായ പഴങ്ങള്‍ മുതല്‍ ഒരാള്‍ക്ക് തിന്നുതീര്‍ക്കാന്‍ കഴിയാത്തത്ര വലിപ്പമുള്ള പഴങ്ങള്‍ വരെ പഴങ്ങളുടെ വലിപ്പം കൊണ്ടും ഇത്തിരിക്കുഞ്ഞന്‍ മുതല്‍ ഒരാളേക്കാള്‍ പൊക്കമുള്ള  കുലകളുടെ വലിപ്പം കൊണ്ടും ആകൃതിയിലെ വ്യത്യസ്തതകള്‍ കൊണ്ടും ആകര്‍ഷണീയമാണ് കല്ലിയൂരിലെ വാഴ മഹോത്സവം.

വാഴപ്പഴങ്ങള്‍ കൂടാതെ വാഴ വിഭവങ്ങഴും, വാഴ കൃഷി സംബന്ധിച്ച വിവരങ്ങളും, ടിഷ്യൂ കള്‍ച്ചര്‍ രീതി അടക്കമുള്ള നൂതന സംവിധാനങ്ങളും മൂല്യ വര്‍ദ്ധിത ഉല്പന്നങ്ങളും, വാഴനാരുകള്‍ കൊണ്ടുള്ള ഉല്പന്നങ്ങളും പ്രദര്‍ശിപ്പിച്ചിട്ടുണ്ട്. വാഴപ്പോള, വാഴക്കൂമ്പ് തുടങ്ങിയവ കൊണ്ടുള്ള അലങ്കാര വസ്തുക്കളുടെ പ്രദര്‍ശനം കൗതുകകരമാണ്.

ശാസ്ത്ര‍ജ്ഞര്‍, കര്‍ഷകര്‍, വിവിധ സംസ്ഥാനങ്ങളില്‍ നിന്നുള്ള പ്രതിനിധികള്‍ അടക്കം നൂറുകണക്കിനാളുകള്‍ വാഴമഹോത്സവത്തിന്റെ സ്ഥിരം പ്രതിനിധികളാണ്. വിവിധ സെമിനാറുകള്‍, പ്രഭാഷണങ്ങള്‍, സാംസ്കാരിക പരിപാടികള്‍ എന്നിവയും വാഴ മഹോത്സവത്തിന്റെ ഭാഗമായി നടക്കുന്നു.

വെള്ളായണി ക്ഷേത്രമൈതാനത്തൊരുക്കിയിരിക്കുന്ന പ്രദര്‍ശനം സെന്റര്‍ ഫോര്‍ ഇന്നവേഷന്‍ ഇന്‍ സയന്‍സ് ആന്റ് സോഷ്യല്‍ ആക്ഷന്‍, കല്ലിയൂര്‍ ഗ്രാമപഞ്ചായത്ത്, വിവിധ കാര്‍ഷിക സ്ഥാപനങ്ങള്‍, കാര്‍ഷിക സര്‍വ്വകലാശാലകള്‍ എന്നിവരുടെ സംയുക്ത ആഭിമുഖ്യത്തിലാണ് നടക്കുന്നത്. സ്വദേശികള്‍ മുതല്‍ വിദേശികള്‍ വരെയുള്ളവരുടെ വലിയ പങ്കാളിത്തമാണ് വാഴ മഹോത്സവത്തിന് അനുഭവപ്പെടുന്നത്.

Banana Popoulu of Hawaii Island
ഹവായ് ദ്വീപില്‍ നിന്നുള്ള പോപ്പലൗ എന്ന ഇനം വാഴക്കായ്
സംഘാടകര്‍ പ്രതീക്ഷിച്ചതിനേക്കാള്‍ വലിയ തിരക്കാണ് വാഴമഹോത്സവത്തിന് അനുഭവപ്പെടുന്നത്. പ്രവേശനത്തിനായുള്ള ക്യൂ മണിക്കൂറുകള്‍ നീളുന്നുണ്ട്. വാഴക്കുലകള്‍ അടുത്തടുത്തായി അടുക്കിയടുക്കി പ്രദര്‍ശിപ്പിച്ചിരുക്കുന്നത് അഭംഗിയാണ്. തിരക്ക് അധികമായതിനാല്‍ സാവകാശത്തോടെ പ്രദര്‍ശനം കാണുന്നതിനും പരിമിതിയുണ്ട്.

Banana Pisang Awak of Thailand
തായ്‍ലന്റില്‍ നിന്നുള്ള പിസാംഗ് ഓവാക്‍ എന്ന ഇനം
നൂറുകണക്കിന് വ്യത്യസ്തമായ വാഴപ്പഴങ്ങള്‍ പ്രദര്‍ശിപ്പിച്ചിട്ടുണ്ടെങ്കിലും അവയെല്ലാം രുചിച്ചു നോക്കുന്നതിന് അവസരമില്ല എന്നത് വലിയ ഒരു പോരായ്മയായി തോന്നി. ഇത്തരം ചെറിയ കുറവുകളുണ്ടെങ്കിലും വളരെ വ്യത്യസ്തവും ശ്ലാഘനീയമായ ഒരു ഉദ്യമവുമാണ് വാഴ മഹോത്സവം.

Banana seedlings by tissue culture
ടിഷ്യു കള്‍ച്ചര്‍ രീതിയില്‍ വാഴ വിത്തുകള്‍ തയ്യാറാക്കുന്നതിന്റെ പ്രദര്‍ശനം

കേരളത്തിലെ എല്ലാ ബ്ലോക്ക് പഞ്ചായത്തുകളിലും ഏതെങ്കിലും ഒരു സ്ഥലത്ത് ഇത്തരം പ്രദര്‍ശനം നടത്തുന്നത് വിനോദസഞ്ചാര മേഖലയിലും കാര്‍ഷികസാസ്കാരിക മേഖലയിലും ഉണര്‍വ്വേകുമെന്ന കാര്യത്തില്‍ സംശയമില്ല.


ദേശീയ വാഴ മഹോത്സവം – കൂടുതല്‍ ചിത്രങ്ങള്‍

പോണിഷ് ബന്തല്‍

പോണിഷ് ബന്തല്‍


സി വി റോസ് – ഫിലിപ്പീന്‍സില്‍ നിന്നും

സി വി റോസ് – ഫിലിപ്പീന്‍സില്‍ നിന്നും


നേന്തിരന്‍ – തമിഴ്‍നാട്

നേന്തിരന്‍ – തമിഴ്‍നാട്


കര്‍പ്പൂരവള്ളി – തമിഴ്‍നാട്

കര്‍പ്പൂരവള്ളി – തമിഴ്‍നാട്


നാട്ടുമൊന്തന്‍ – തമിഴ്‍നാട്

നാട്ടുമൊന്തന്‍ – തമിഴ്‍നാട്


ഗ്രാന്‍ഡ് നൈന്‍ – ആന്ധ്രാപ്രദേശ്

ഗ്രാന്‍ഡ് നൈന്‍ – ആന്ധ്രാപ്രദേശ്


 ഒരു ചുമപ്പ് ഇനം വാഴപ്പഴം


ജഹാജി വാഴപ്പഴം – ആസ്സാം

ജഹാജി വാഴപ്പഴം – ആസ്സാം


വെള്ള കാസ്കല്‍ – അസം

വെള്ള കാസ്കല്‍ – അസം


തൊഴുകൈ വാഴപ്പഴം

തൊഴുകൈ വാഴപ്പഴം


വെള്ളക്കപ്പപ്പഴം – കേരളം

വെള്ളക്കപ്പ പഴം – കേരളം


അമൃത പാനി – ആന്ധ്രാപ്രദേശ്

അമൃത പാനി – ആന്ധ്രാപ്രദേശ്


വാഴക്കൂമ്പ് (ചുണ്ട്) ഉപയോഗിച്ച് നിര്‍മ്മിച്ച അലങ്കാര താറാവ്

വാഴക്കൂമ്പ് (ചുണ്ട്) ഉപയോഗിച്ച് നിര്‍മ്മിച്ച അലങ്കാര താറാവ്


വാഴയുടെ ഭാഗങ്ങള്‍ ഉപയോഗിച്ച് തയ്യാറാക്കിയ വ്യാളീരൂപം

വാഴയുടെ ഭാഗങ്ങള്‍ ഉപയോഗിച്ച് തയ്യാറാക്കിയ വ്യാളീരൂപം

2018 ലെ രക്തചന്ദ്ര ദര്‍ശനം

2018 ജനുവരി 31ന് ദൃശ്യമായ രക്തചന്ദ്രന്‍
2018 ജനുവരി 31ന് ദൃശ്യമായ രക്തചന്ദ്രന്‍

2018 ജനുവരി 31. സൂപ്പര്‍ ബ്ലൂ മൂണ്‍ ചന്ദ്രഗ്രഹണം. ചന്ദ്രന്‍ രക്തചന്ദ്രനാകുന്ന അപൂര്‍വ്വമായ ആകാശക്കാഴ്ച. ദിവസങ്ങളുടെ കാത്തിരിപ്പ് തീരാന്‍ പോവുകയാണ്…

വൈകിട്ട് 6.30 മുതല്‍ ഞങ്ങള്‍ തിരുവനന്തപുരം വിഴിഞ്ഞം ഹാര്‍ബറിനടുത്ത് രക്തചന്ദ്രനെ പ്രതീക്ഷിച്ച് കാത്തുനിന്നു. ഞാന്‍ താമസിക്കുന്ന ക്വാട്ടേഴ്സിനടുത്ത് നിന്നും ഒരു കിലോ മീറ്റര്‍ മാറിയാണ് ഹാര്‍ബര്‍. ക്വാട്ടേഴിനടുത്ത് മരങ്ങളുടെ തടസ്സം കാരണം കിഴക്കേ ചക്രവാളം കാണാന്‍ കഴിയില്ല. ടെറസ്സില്‍ നിന്നാലും തുടക്കത്തിലെ ദൃശ്യങ്ങള്‍ നഷ്ടമാകും.

എന്റെ കൂടെ സുഹൃത്ത് ഇജാസ്, ഭാര്യ വിദ്യ, മക്കളായ കാളിന്ദിയും കാവേരിയും. പാറപ്പുറം പള്ളിയ്ക്ക് സമീപം പോര്‍ട്ടിന്റെ ബല്ലാര്‍ഡ് സ്ഥിതിചെയ്യുന്ന സ്ഥലം കടലിലേക്ക് തള്ളിനില്കുന്ന ഒരു മുനമ്പാണ്. അവിടെ നിന്ന് നോക്കിയാല്‍ കിഴക്കേ ചക്രവാളം കുറെയേറെ വ്യക്തമായി കാണാം.

ഞങ്ങളുടെ പ്രധാന ലക്ഷ്യം രക്തചന്ദ്രന്റെ ഫോട്ടോ എടുക്കുകയാണ്.

പക്ഷേ സന്ധ്യയായപ്പോള്‍ മുതല്‍ തന്നെ ചക്രവാളം മേഘാവൃതം … മാത്രമല്ല കിഴക്ക് രക്തചന്ദ്രനെ പോയിട്ട് തവിട്ട് ചന്ദ്രനെ പോലും കാണാനില്ല … പിന്നെയും കാത്തിരിപ്പ് … സമയം 7.10 … അല്പാല്പമായി രക്തചന്ദ്രന്‍ ദൃശ്യമായിതുടങ്ങി … പക്ഷേ വെളിച്ചം തീരെ കുറവ് …വളരെ മങ്ങി മങ്ങി … ഫോട്ടോ ഒന്നും ശരിയാി കിട്ടുന്നില്ല …

ഏഴേ മുക്കാലോടെ പൂര്‍ണ്ണ ഗ്രഹണം അവസാനിക്കും. അത് കഴിഞ്ഞാല്‍ പിന്നെ രക്തചന്ദ്രനെ കാണാന്‍ കഴിയില്ല. ചന്ദ്രന്‍ ഭൂമിയുടെ നിഴലില്‍ നിന്നും അല്പാല്പമായി പുറത്ത് കടക്കാന്‍ തുടങ്ങുന്നതോടെ ചന്ദ്രന്‍ പ്രകാശിതമായിതുടങ്ങും. അതോടെ ഗ്രഹണഭാഗത്തിന്റെ ചുവപ്പും കുറയും. ഹാര്‍ബറിനപ്പുറം വിഴിഞ്ഞം പട്ടണമാണ്. അവിടെനിന്നുള്ള പ്രകാശ മലിനീകരണവും വ്യക്തമായ കാഴ്ചയ്ക്ക് തടസ്സം സൃഷ്ടിക്കുന്നുണ്ടായിരുന്നു.

അങ്ങനെ ഞങ്ങള്‍ ക്വാട്ടേഴ്സിന്റെ ടെറസ്സില്‍ നിന്ന് ഗ്രഹണം കാണാന്‍ തിരുമാനിച്ച് തിരികെ വന്നു. അപ്പോഴേക്കും ടെറസ്സില്‍ നിന്നം കാണാവുന്ന ഉയരത്തില്‍ ചന്ദ്രന്‍ എത്തിയിരുന്നു. ഭംഗിയായി രക്തചന്ദ്രനെ കാണാം. കുട്ടികള്‍ ബൈനോകുലറിലൂടെ കാഴ്ച കണ്ട് ആര്‍ത്ത് വിളിക്കുന്നുണ്ടായിരുന്നു.

ഞാന്‍ ക്യാമറയും ട്രൈപോഡും സെറ്റ് ചെയ്ത് കഴിഞ്ഞപ്പോഴേക്കും പക്ഷേ പൂര്‍ണ്ണ ഗ്രഹണം അവസാനിക്കാറായിരുന്നു. രക്തചന്ദ്രബിമബത്തിന്റെ താഴെ നിന്നും വെളിച്ചം ദൃശ്യമായിത്തുടങ്ങുന്നു.

പെട്ടന്ന് തന്നെ കുറച്ച് ക്ലിക്കുകള്‍ … വളരെ ക്ഷമ ആവശ്യമായ പണിയാണ്. ഒരു ചിത്രം മാത്രം അല്പം ഭംഗിയായി കിട്ടി. വളരെ വേഗം ചന്ദ്രന്റെ ചുവപ്പ് നഷ്ടമായി. മാത്രമല്ല, ചന്ദ്രബിംബത്തിന്റെ പ്രകാശ തീവ്രത കാരണം ഒന്നും തെളിയ൩തെയായി ….

എങ്കിലും അപൂര്‍വ്വമായ ഈ ആകാശക്കാഴ്ചക്ക് സാക്ഷിയാകാന്‍ കഴിഞ്ഞു.

തിരുവനന്തപുരത്തെ പുതുവര്‍ഷ ഫെസ്റ്റുകള്‍

കുട്ടികള്‍ക്ക് ഫെസ്റ്റുകളും റൈഡുകളും ഏറെ പ്രിയപ്പെട്ടതാണ്. 2018നെ വരവേല്‍ക്കാന്‍ തിരുവനന്തപുരത്ത് അനവധി കാഴ്ചകള്‍ ഒരുങ്ങിയിരുന്നു. പുത്തരിക്കണ്ടം മൈതാനത്ത് ഒരുക്കിയ അനന്തപുരി ഫെസ്റ്റ്, ഈഞ്ചക്കല്‍ കെ.എസ്.ആര്‍.ടി.സി. മൈതാനത്ത് ഒരുക്കിയ ട്രാവന്‍കൂര്‍ ഫെസ്റ്റ്, കനകക്കുന്നിലെ പുഷ്പോത്സവം എന്നിവയായിരുന്നു പ്രധാനപ്പെട്ടവ. യന്ത്രസഹായത്താല്‍ ചലിക്കുന്ന മൃഗങ്ങളും ചരിത്രസ്മാരകങ്ങളുടെ മാതൃകകളും ആയിരുന്നു അനന്തപുരി ഫെസ്റ്റ്, ട്രാവന്‍കൂര്‍ ഫെസ്റ്റ് എന്നിവയുടെ ആകര്‍ഷണം. കൂടാതെ ത്രിമാന ചിത്രങ്ങളും പുതുമയുള്ളതായിരുന്നു. പുഷ്പോത്സവം ഗംഭീരം. പക്ഷേ അസാമാന്യ തിരക്കായിരുന്നു. മൊബൈലില്‍ പകര്‍ത്തിയ കുറച്ച് ചിത്രങ്ങള്‍ പങ്കുവയ്ക്കുന്നു.

P_20180114_180956_HDR.jpg
പുഷ്പോത്സവം @ കനകക്കുന്ന്

P_20180111_174348_HDR.jpg
അനന്തപുരി ഫെസ്റ്റ്

P_20180107_161924.jpg
ട്രാവന്‍കകൂര്‍ ഫെസ്റ്റ് – 3D ചിത്രം

P_20180107_161835.jpg
ട്രാവന്‍കകൂര്‍ ഫെസ്റ്റ് – 3D ചിത്രം

P_20180107_161737.jpg