Tag Archives: vaccine

ആളെക്കൊല്ലുന്ന വാക്സിൻ; പത്ത് വർഷത്തിൽ ആകെ മരണം 10612! നിങ്ങള്‍ ഞെട്ടിയോ?

വാക്സിനേഷന്‍ മൂലം പ്രതിദിനം 3 കുട്ടികള്‍ ഈ രാജ്യത്ത് മരിക്കുന്നുണ്ടോ?

ആളെക്കൊല്ലുന്ന വാക്സിൻ; പത്ത് വർഷത്തിൽ ആകെ മരണം 10612!

നാരദ ന്യൂസ് പോര്‍ട്ടലില്‍ മാര്‍ച്ച് 15ന് വന്ന വാര്‍ത്തയുടെ തലക്കെട്ടാണ്.[1] വാക്സിന്‍ നല്‍കിയ ശേഷം ഉടന്‍ ഉണ്ടായതും, വാക്സിന്റെ പ്രതിപ്രവര്‍ത്തനം മൂലവും ഉണ്ടായ മരണങ്ങളാണോ ഇത്? വാര്‍ത്തയില്‍ നിന്നും അങ്ങനെ വേണം മനസ്സിലാക്കാന്‍. 10 വര്‍ഷത്തില്‍ 10612 മരണം! ഒരു വര്‍ഷം 1061 മരണം. ഒരു മാസം ശരാശരി 88 മരണം. പ്രതിദിനം ഏകദേശം 3 മരണം. അതായത് ഇന്ത്യാ മഹാരാജ്യത്ത് വാക്സിന്‍ നല്‍കുന്നതിലൂടെ പ്രതിദിനം രണ്ടോ മൂന്നോ ശിശുമരണം നടക്കുന്നു.

ശിശുമരണങ്ങള്‍ സംബന്ധിച്ച ഈ കണക്കുകള്‍ എവിടെ നിന്നാണ് കിട്ടിയത്?

ന്യൂ ഡൽഹി സെന്റ് സ്റ്റീഫൻസ് ഹോസ്പിറ്റലിലെ പീഡിയാട്രിക്ക് വിഭാഗം തലവൻ ഡോക്ടർ ജേക്കബ് പുളിയേൽ, ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസിലെ ബയോസ്റ്റാറ്റിസ്റ്റിക്സ് പ്രൊഫസർ ഡോക്ടർ ശ്രീനിവാസ് എന്നിവർ ചേർന്ന് നടത്തിയ പഠനത്തെ പറ്റി പറഞ്ഞുകൊണ്ടാണ് വാര്‍ത്ത തുടങ്ങുന്നത്. എന്നാല്‍ ഇവരുടെ പഠന റിപ്പോര്‍ട്ടില്‍ നിന്നുല്ല മരണത്തെ സംബന്ധിച്ച ഈ എമണ്ടന്‍ കണക്കുകള്‍ നാരദ ഉദ്ധരിക്കുന്നത്. കണക്കുകള്‍ എവിടെ നിന്ന് കിട്ടി എന്ന് എവിടെയും പറയുന്നില്ല.

ഡോ. കെ.പി. അരവിന്ദന്റെ പ്രതികരണം

ഈ വാര്‍ത്തയെ പറ്റി പ്രതികരിച്ചുകൊണ്ട് ജനകീയാരോഗ്യ പ്രവര്‍ത്തകനായ ഡോ. കെ.പി. അരവിന്ദന്‍ ഫേസ്ബുക്കില്‍ ഇങ്ങനെ എഴുതി-[2]

ഈ കണക്ക് എവിടെ നിന്ന് കിട്ടി എന്നറിയില്ല. എ.ഇ.എഫ്.ഐ (AEFI – Adverse events following immunization) യുടെ കണക്കായിരിക്കണം. വാക്സിനേഷൻ കഴിഞ്ഞുള്ള ദിവസങ്ങളിൽ എന്തെങ്കിലും പ്രശ്നങ്ങൾ ഉണ്ടായിട്ടുണ്ടെങ്കിൽ അവ മുഴുവൻ പരിശോധിച്ച് ഏതെങ്കിലും പ്രശ്നം വാക്സീൻ മൂലമാണോ എന്ന് കണ്ടു പിടിക്കുന്നതിനുള്ള സംവിധാനമാണത്. വിവരാവകാശ നിയമ പ്രകാരം ആർക്കും ലഭിക്കുന്ന വിവരങ്ങളാണിത്.

വാക്സിനേഷന്‍ കഴിഞ്ഞുള്ള ദിവസങ്ങളിലെ എല്ലാ തരത്തിലുമുള്ള രോഗങ്ങളും മരണങ്ങളുമാണ് AEFI ആയി റിപ്പോർട്ട് ചെയ്യുന്നത്. ഇവയില്‍ ഏതെങ്കിലും രോഗമോ മരണമോ വാക്സിന്‍ മൂലം ഉണ്ടാകുന്നതാണോ എന്ന് പരിശോധിക്കുന്നു. ഗുരുതര രോഗങ്ങൾ, മരണങ്ങൾ എന്നിവയിൽ മിക്കവാറും എല്ലാത്തിനും വാക്സീൻ അല്ല മറ്റു കാരണങ്ങൾ ആണ് ഉള്ളത്. അതിനാലാണ് ഇതെല്ലാം സൂക്ഷ്മനിരീക്ഷണം നടത്തുന്ന യൂറോപ്പ്യൻ രാജ്യങ്ങളിലും അമേരിക്കയിലും ഒക്കെ വാക്സിനേഷൻ ഇന്നും നില നിന്നു പോകുന്നത്.

ഡോ. അരവിന്ദന്‍ ഇതിനെ ഇങ്ങനെ വിശദീകരിക്കുന്നു-

ഒരു വാക്സിനും കൊടുക്കാത്ത ഒരു പ്രദേശത്ത് ഒരു വർഷം ഒരു നിശ്ചിത പ്രായത്തിലുള്ള കുട്ടികളിൽ 3650 മരണങ്ങൾ ഉണ്ടാവും എന്ന് വിചാരിക്കുക. അതായത് വ്യത്യസ്തമായ കാരണങ്ങളാൽ ദിവസം 10 മരണങ്ങൾ വീതം. ഈ പ്രദേശത്ത് ഒരു പുതിയ വാക്സിൻ പരിപാടി തുടങ്ങി എന്ന് സങ്കൽപ്പിക്കുക. 100% കുട്ടികളും വാക്സീൻ എടുത്താൽ, ഏതു ദിവസം വാക്സിൻ കൊടുത്താലും AEFI കണക്കുകൾ പ്രകാരം വാക്സീൻ കഴിഞ്ഞുള്ള ഓരോ ദിവസവും 10 മരണങ്ങള്‍ നടക്കും. അതായത് വാക്സീൻ പരിപാടി ഉണ്ടെങ്കിലും ഇല്ലെങ്കിലും 3ദിവസങ്ങളില്‍ 30 മരണങ്ങൾ. വർഷത്തിൽ 3650 മരണങ്ങൾ. നാരദയിലെ ലേഖനെ പോലെയുള്ള വാക്സിന്‍ വിരുദ്ധര്‍ തികഞ്ഞ വിവരമില്ലായ്മ മൂലം ഈ 3650 മരണങ്ങളും വാക്സീൻ കൊണ്ടാണ് എന്നു പറയും!

ചില വാക്സിന്‍ വിരുദ്ധ ആക്ടിവിസ്റ്റുകളാണ് ഇത്തരം അബദ്ധങ്ങള്‍ പ്രചരിപ്പിക്കുകയും ഇത്തരം മാധ്യമപ്രവര്‍ത്തകര്‍ക്ക് എത്തിക്കുകയും ചെയ്യുന്നത്. പി.ജി ഹരിയെപ്പോലുള്ള ആക്ടിവിസ്റ്റുകൾ ഇതേ കാര്യം പല തവണ പറഞ്ഞു നടന്നിട്ടുള്ളതാണ്. അവർക്ക് വിവരമില്ലാത്തതു കൊണ്ടല്ല; കാരണം പല ചർച്ചകളിലും പലരും ഇക്കാര്യം ചൂണ്ടിക്കാണിച്ചിട്ടുള്ളതാണ്. ഈ ആക്ടിവിസ്റ്റുകൾ അറിഞ്ഞുകൊണ്ടു തന്നെ പച്ചക്കള്ളം പ്രചരിപ്പിക്കുകയാണ്.

നാരദ വാര്‍ത്തയിലെ മറ്റൊരു ഭാഗം നോക്കൂ …

കേരളത്തിൽ വാക്സിൻ കുത്തിവെപ്പെടുത്ത അതേ ദിവസം, 2011 ഡിസംബർ 14 ന് ആൻസി എന്ന കുട്ടി മരണപ്പെട്ടു. തിരുവനന്തപുരത്തെ വിതുര പ്രാഥമികാരോഗ്യ കേന്ദ്രത്തിലായിരുന്നു മരണം. വാക്സിൻ നൽകിയതിനെത്തുടർന്ന് കുട്ടിക്ക് പനി ബാധിക്കുകയും തുടർന്ന് മരണപ്പെടുകയുമായിരുന്നു. 2015 ഡിസംബർ മൂന്നിന് വാക്സിൻ നൽകിയതിനെത്തുടർന്ന് കർണാടകയിൽ ഇരട്ടക്കുട്ടികൾ മരിച്ചതും വാർത്തയായിരുന്നു. ഈ മരണങ്ങളെല്ലാം ചൂണ്ടിക്കാട്ടുന്നത് പെന്റാവലന്റ് വാക്സിന്റെ ദോഷവശങ്ങളാണ്.

അതായത് 2011ന് ശേഷം ഏഴില്‍പരം വര്‍ഷങ്ങളില്‍ വാക്സിന്‍ മൂലം മരണപ്പെട്ടു എന്ന് ആരോപിക്കുന്നതിന് ഇവര്‍ക്ക് ആകെ മൂന്ന് സംഭവങ്ങള്‍ മാത്രമാണ് ഉദ്ധരിക്കാനുള്ളത്. ഇതില്‍ വിതുരയിലെ കുട്ടി പനിമൂലമാണ് മരിച്ചത്. പനിക്ക് കാരണം വാക്സിനാണ് എന്നതിന് തെളിവൊന്നും ഇല്ല. വാക്സിന്‍ നല്‍കി മൂന്ന് ദിവസങ്ങള്‍ക്കുള്ളില്‍ നടക്കുന്ന എല്ലാ മരണവും വാക്സിന്‍ മൂലം ഉണ്ടാകുന്നതാണെന്നാണ് നാരദ കരുതുന്നത്.

കഴിഞ്ഞ അഞ്ച് വര്‍ഷം ഭാരതത്തില്‍ മരിച്ചത് 50 ലക്ഷം ആളുകളാണ്[3]. ഇവരില്‍ എല്ലാവരുംതന്നെ, മരണത്തിന് 72 മണിക്കൂര്‍ മുമ്പ് വെള്ളം കുടിച്ചവരാണ്. അതുകൊണ്ട് വെള്ളം കുടിച്ച 50 ലക്ഷം ആളുകളാണ് ഭാരതത്തില്‍ കഴിഞ്ഞ 5 വര്‍ഷമായി മരണപ്പെട്ടത് എന്ന് പറയാം. ഇതുതന്നെയാണ് വാക്സിന്‍ വിരുദ്ധരുടെ വാദവും.

“ഇയാൾക്കും (ലേഖകന്‍) ഈ പച്ചക്കള്ളം പ്രസിദ്ധീകരിച്ച പ്രസിദ്ധീകരണത്തിനും എതിരെ അപകീർത്തി കേസെടുക്കേണ്ടതാണ്.” ഡോക്ടര്‍ അരവിന്ദന്‍ എഴുതുന്നു.

പറഞ്ഞുവന്നത് ഇതാണ്, മുകളിലെ തലക്കെട്ട് വായിച്ച് നിങ്ങള്‍ ഞെട്ടുന്നുണ്ടങ്കില്‍ സൂക്ഷിച്ചോളൂ, നിങ്ങളെ ആര്‍ക്കും പറഞ്ഞ് പറ്റിക്കാന്‍ എളുപ്പമാണ്. അട്, മാഞ്ചിയം, തേക്ക് പോലെയുള്ള തട്ടിപ്പുകളില്‍ വളരെ പെട്ടന്ന് ഇരയാകുന്നവരില്‍ ഒരാളാണ് നിങ്ങള്‍. ജാഗ്രതൈ.


അവലംബം

  1. ആളെക്കൊല്ലുന്ന വാക്സിൻ; പത്ത് വർഷത്തിൽ ആകെ മരണം 10612! – നാരദ വാര്‍ത്ത. 2018 മാര്‍ച്ച് 15.
  2. ഡോ. കെ.പി. അരവിന്ദന്റെ ഫേസ്ബുക്ക് പോസ്റ്റ്, 2018 മാര്‍ച്ച് 17.
  3. India – Crude death rate, , knoema.